Eńbek jáne halyqty áleýmettik qorǵaý ministrligi zeinetaqy qoryndaǵy aqshanyń bir bóligin paidalanýǵa qatysty usynystar ázirlep, qoǵamdyq talqylaýǵa shyǵarady. Bul týraly búgin premer-ministrdiń birinshi orynbasary – qarjy ministri Álihan Smaiylov málimdedi, dep habarlaidy Sputnik Qazaqstan.
Ministr prezidenttiń joldaýyn iske asyrý jónindegi jalpyulttyq is-sharalar josparynda zeinetaqy jinaǵyn paidalanýǵa qatysty tapsyrma bar ekenin atap ótti.
"Úkimetke halyqtyń jekelegen sanattaryna zeinetaqy qoryndaǵy aqshanyń bir bóligin baspana men bilimge jumsaýǵa ruqsat berý týraly tapsyrma berildi. Eńbek jáne halyqty áleýmettik qorǵaý ministrligi múddeli organdarmen birlesip, tiisti usynystardy ázirleidi. Olar bekitilgen merzimde qajetti usynystardy daiyndap, qoǵamdyq talqylaýǵa shyǵarady dep oilaimyn", - dedi Smaiylov úkimet kýlýarynda.
Ol zeinetaqy jinaǵyn qordaǵy shotta aqshasy bar qazaqstandyqtar ǵana ala alatynyn aitty.
Osy oraida jýrnalister ministrden kelesi jyldan bastap qazaqstandyqtar zeinetaqy jinaǵyn paidalana ala ma dep surady.
"Aldymyzda osyndai mindet tur", - dep qysqa qaiyrdy Smaiylov.
Eske sala ketsek, 2 qyrkúiekte Qasym-Jomart Toqaev Qazaqstan halqyna alǵashqy joldaýynda úkimet pen Ulttyq bank zeinetaqy júiesiniń tiimdiligin arttyrýy qajet ekenin aitqan bolatyn. Prezident úkimetke jyldyń sońyna deiin jumys isteitin adamdardyń zeinetaqy jinaǵynyń bir bóligin maqsatty paidalaný máselesin pysyqtaýdy tapsyrdy.
