© Photo : Pixabay / Sabine van Erp
Eńbek jáne halyqty áleýmettik qorǵaý ministri Tamara Dúisenova zeinet jasyn tómendetý máselesin talqylaýdyń alǵashqy nátijeleri týraly aitty, dep habarlaidy Sputnik Qazaqstan.
Buǵan deiin ministr bir top belsendi áieldermen kezdesip, zeinet jasyn tómendetý máselesin talqylaǵan bolatyn.
Dúisenovanyń aitýynsha, sol kezdesýde belsendiler de, ministrlik te óz usynysyn jasady.
"Olarǵa bizdiń usynystarymyz da unady. Qazir jumys toby aiasynda jumysty jalǵastyryp, esep-qisapty jasap jatyrmyz. Kez kelgen áleýmettik qoldaýǵa aqsha kerek qoi. Ony bárimiz jaqsy bilemiz. Qazir taimaýt alyp, bárin eseptep shyǵýǵa kelistik. Sol kezde naqty qai usynystyń tiimdi bolatynyn bilemiz. Sosyn naqty bir sheshimge kelgennen keiin sol áieldermen birge shyǵyp, barlyq aqparatty beremiz", - dedi Dúisenova senattaǵy parlamenttik tyńdaýdan keiin jýrnalisterge bergen suhbatynda.
Osy oraida tilshiler áieldermen basqa taǵy qandai sanattarǵa zeinetke erte shyǵýǵa múmkindik beriletinin surady. Al ministr qazirgi zańnamada zeinetke erte shyǵýdyń normasy bar ekenin eske saldy.
Qazaqstandyqtar 50 jastan bastap zeinetaqy annýitetin rásimdei alady. Biraq shotta qajetti jinaqtyń somasy bolýy kerek. Aldaǵy ýaqytta osy normaǵa ózgeris engizilýi múmkin.
"Qoldanystaǵy zańnamada 50 jastan bastap zeinetke shyǵýǵa múmkindik beriledi. Alaida zeinetaqy jinaqtaryna qatysty másele bar. Qazir biz sony qarastyryp jatyrmyz", - dep atap kórsetti Dúisenova.
Aita keteri, Qazaqstanda zeinet jasyn tómendetý máselesin keńinen talqylanyp jatyr. Áielder zeinetke shyǵý jasyn 55-ke nemese 58-ge deiin tómendetýdi suraidy.
Budan bólek, ziiandy jáne aýyr óndiriste isteitin jumysshylar da zeinet jasyn tómendetýdi talap etken.
