"Halyq kommýnisteri" fraktsiiasynyń depýtattary múgedek balany tárbielep otyrǵan ata-ananyń zeinet jasyn tómendetýdi usyndy. Osyǵan orai, olar úkimet basshysynyń orynbasary Gúlshara Ábdiqalyqovaǵa depýtattyq saýal joldady, dep habarlaidy Sputnik Qazaqstan.
Ata-anaǵa qajetti jeńildikter
Depýtat Magerram Magerramovtyń aitýynsha, osy sanattaǵy otbasylarǵa arnaiy mártebe berý kerek. Sóitip, zeinet jasyn tómendetip, jumys isteitin ata-analarǵa taǵy birqatar jeńildik bergen durys.
"Biz múgedek balany tárbielep otyrǵan ata-ananyń zeinet jasyn tómendetýdi usynamyz. Sondai-aq, ata-ananyń bireýin jumystan erte jiberý máselesin qarastyrǵan jón. Sebebi múgedek balaǵa táýlik boiy qaraý qajet. Oǵan biraz kúsh-jiger ketedi. Psihologiialyq júkteme de az emes", - dedi Magerramov májilistiń jalpy otyrysynda.
Múgedek balalarǵa qandai kómek kerek?
Fraktsiia depýtattary qamqorshylyqty rásimdeý tártibin de jeńildetý kerek dep sanaidy. Óitkeni qazirgi kezde bul protsedýralarǵa 9 aiǵa deiin ketedi. Osy ýaqyttyń ishinde eshqandai qarjylai kómek berilmeidi. Ondaida tolyq emes otbasylar qatty qinalady.
Budan bólek, depýtat Magerramov arnaiy ortopediialyq aiaq kiimdi taratý tártibin qaita qarap, balabaqshalarda múgedek balalar úshin arnaiy toptardy ashýdy usyndy.
"Sosyn múgedek balalardy stomatologiialyq emdeý jaǵynan birqatar qiyndyq bar. Memlekettik emhanalardyń barlyǵynda tolyqqandy em-dom jasamaidy. Osy meditsinalyq qyzmettiń sapasy da tómen. Al jekemenshik stomatologiialarda qyzmet aqysy qymbat", - dep atap kórsetti Magerramov.
Qazaqstanda kimniń zeinet jasy ulǵaiady?
Qazaqstanda áielderdiń zeinet jasyn 2027 jylǵa deiin birtindep 63 jasqa deiin ulǵaitý josparlanǵan. Degenmen, keibir áielderdiń zeinet jasy ózgermeidi. Olardyń ishinde kópbalaly analar jáne Semei iadrolyq poligonynda turǵan áielder bar.
Máselen, bes jáne odan kóp balasy bar áielder 53 jasta zeinetke shyǵa alady. Al Semei iadrolyq poligonynynyń joǵary radiatsiialyq qaýpi bar aimaqtarda bes jyldan artyq turǵan áielderge 45 jasta zeinetke shyǵýǵa ruqsat bar.
