Áielder men erler BJZQ-da zeinetaqy jinaqtary jetkilikti bolǵan kezde zeinetke tiisti jastan erte shyǵa alady. Ol úshin zeinetaqy annýitetin - zeinetaqy jasyna jetkenge deiin tólem jasaý quqyǵyn paidalanýǵa bolady. Biyl 1 qańtardan bastap azamattar mundai tólemderge 45 jastan bastap ótinish bere alady. Bul rette erler zeinetaqy alýdy 55 jastan, áielder - 52,5 jastan bastai alady. Ziian óndiristerde jumys isteitin adamdar 50 jastan bastap zeinetaqy ala bastaidy.
"Osyǵan bailanysty, sondai-aq, ai saiynǵy annýitettik tólemderdiń eń tómengi mólsheriniń eń tómengi kúnkóris deńgeiiniń 70 paiyzyna deiin tómendeýimen (buryn annýitettik tólemder eń tómengi zeinetaqy mólsherinen tómen bolmaýy tiis edi) zeinetaqy annýiteti sharttaryn jasasý BJZQ salymshylarynyń kópshiligi úshin qoljetimdi boldy", - dedi ministrlik ókilderi.
Ministrlikte zeinetaqy jasyn esepteý kezinde qoǵamnyń demografiialyq jáne ekonomikalyq erekshelikteri eskeriletini aityldy. Damyǵan jáne damýshy elderde adamdardyń qartaiýy baiqalady. Vitse-ministr Erlan Ospanovtyń aitýynsha, bul Qazaqstanǵa da bailanysty. BUU boljamdary boiynsha, Qazaqstanda halyq sany 2050 jyly 24,7 million adamǵa deiin artady. BUU málimetterine sáikes, elde 65 jastan asqandardyń úlesi shamamen eki ese artqany baiqalady. BUU jas shkalasy boiynsha Qazaqstan halqy qart sanalady.
"Halyqtyń qartaiýyna bailanysty zeinetaqymen qamsyzdandyrýdy qarjylandyrý kózi - qyzmetkerdiń, jumys berýshiniń esebinen salyqtardy nemese mindetti zeinetaqy jarnalarynyń mólsherlemecin kóterý. Qazir álem elderi halyqtyń qartaiý protsesin eskerip, zeinet jasyn kóterýge tyrysyp jatyr", - dep atap ótti Eńbek jáne halyqty áleýmettik qorǵaý vitse-ministri Erlan Ospanov.
Mysal retinde ministrlik ókili zeinetaqy jasy bizdiń elge qaraǵanda buryn da joǵary bolǵan Eýropa elderin, sondai-aq, kórshiles elder ishinde Reseide 2028 jylǵa deiin zeinetaqy jasy bes jylǵa ósetinin, Ázerbaijanda zeinetaqy jasy 60-tan 65 jasqa deiin ósetinin keltirdi. Sonymen qatar, qazir elde belgilengen zeinetaqy jasy halyqaralyq tájiribege jáne álemde qalyptasqan ekonomikalyq, demografiialyq jaǵdaiǵa sáikes keletini aityldy.
Eger áielder úshin zeinetke shyǵý jasy dál qazir 58 jasqa deiin qysqaratyn bolsa, onda 2022 jyly qorda shottary bar 263 956 áiel zeinetke shyǵa alar edi. BJZQ ókilderi zeinetaqy jasy qysqarǵan jaǵdaida jyl saiynǵy zeinetaqy tólemderiniń somasy qanshalyqty ulǵaiatynyn boljaý qiyn ekenin jetkizdi.
Búginde Biryńǵai jinaqtaýshy zeinetaqy qory salymshylarynyń shottarynda shamamen 13 trillion teńge bolatyn jinaq bar. Byltyr BJZQ salymshylarynyń shottaryna jalpy kólemi 1,3 trillion teńge kóleminde zeinetaqy jarnalary tústi. Sonyń ózinde byltyr qordan tólenetin zeinetaqy tólemderiniń somasy 207,8 milliard teńge boldy.
Sonymen qatar, BJZQ-da naqty kezeńdegi tólemder túsimderdiń kólemine bailanysty emes ekeni aityldy, sebebi naqty salymshyǵa BJZQ-dan tólenetin tólemder onyń jeke zeinetaqy shotyndaǵy eńbek qyzmeti barysynda qalyptastyrylǵan zeinetaqy jinaqtary somasynyń mólsherinen júzege asyrylady.
Sondai-aq, BJZQ ókilderi zeinetaqy jinaqtaryn paidalaný baǵdarlamasy barysynda shottardan soma alynsa da, áielderdiń zeinetaqy jasy tómendese de, qorda qarajat tapshylyǵy bolmaitynyn aitty. Olar osy baǵdarlamany paidalanǵan adamdardyń zeinetaqy tóleý somasyna ǵana áser etedi. Bolashaqta olar jinaqtaryn paidalanbaǵan salymshylarǵa qaraǵanda azyraq zeinetaqy alady.
Buǵan deiin Qazaqstanda zeinetke shyǵý jasyn tómendetý máselesin talqylaý josparlanǵan edi. Premer-ministrdiń orynbasary Eraly Toǵjanov bul máseleni jyl sońyna deiin talqylaý josparlanǵanyn aitty.
Foto: elements.envato.com
