Ýkrainanyń jańadan sailanǵan prezidenti Vladimir Zelenskii eldiń NATO-ǵa múshe bolý máselesin referendýmǵa shyǵarýǵa ýáde berdi.
5 maýsymda Azat Eýropaǵa bergen suhbatynda Zelenskii Ýkraina men onyń azamattarynyń táýelsiz uiymdardy tańdaýyna quqyǵy bar ekenin aitty.
Onyń aitýynsha, bilik "árbir ýkrain azamatyna NATO-nyń qandai uiym ekenin, oǵan múshe bolý sonshalyqty qorqatyn nárse emes ekenin aityp" túsindirýi tiis jáne "ýkrain azamattary daiyn bolǵan kezde bul suraqty mindetti túrde referendýmǵa shyǵaramyz" dedi.
5 maýsymda shetelge (Eýropa) alǵash saparyn bastaǵan Zelenskii Ýkrainanyń Eýroodaq pen NATO-nyń tolyq múshesi bolýǵa umtylatynyn jetkizdi. Buǵan deiin mundai málimdemeni eldi basqarǵan eks-prezident Petr Poroshenko da aitqan.
Máskeý NATO aýmaǵynyń ulǵaiýyn ásirese Ýkraina men Grýziianyń odaqqa qosylý josparyn jii synaidy.
