Prezident Vladimir Zelenskii Ýkrainany Eýropa Odaǵyna (EO) múshe qylyp engizý týraly ótinishke qol qoidy. Bul týraly memleket basshysynyń ózi "Telegram-kanalyna" jazyp, qol qoiý kezi men qujattyń sýretin jariialady.
Aryz Eýropa komissiianyń prezidenti Ýrsýla fon der Liaienniń atyna jazyldy. Qujattyń qashan qaralatyny belgisiz. Osyǵan deiin ólkeniń premer-ministri Denis Shmygal Ýkraina uiymǵa arnaiy tártippen kiretinin aitqan.
Sondai-aq, Zelenskii video úndeý jasap, Ýkrainany shuǵyl Eýropa Odaǵyna qosýdy suraǵan. Ol ýkrain armiiasy óz jeri úshin ǵana emes, jalpy Eýropa úshin soǵysyp jatqanyn aityp, "uiymǵa kirýge laiyqty" ekenin jetkizgen.
Aita keteiik, Resei prezidenti Vladimir Pýtinniń "Donbastaǵy halyqty qorǵaý" týraly málimdemesinen keiin orys áskeri 24 aqpanda Ýkrainaǵa basyp kirdi. Bes kúnnen beri eldiń barlyq aimaǵynda soǵys júrip jatyr.
Ýkrainanyń aqparat quraldary Reseidiń shabýylynan 352 beibit turǵyn qaza bolǵanyn, olardyń ishinde balalar bar ekenin jazyp jatyr. Oqiǵanyń alǵashqy kúni Kiev 137 sarbaz qurban bolǵanyn málimdedi. Odan keiin jaǵdai belgisiz.
Ýkraina qorǵanys ministrligi Resei 5300 sarbazyn joǵaltty dep málimdegen. Bul sanattyń ishinde qaza tapqandar, tutqynǵa túskender jáne jaralanǵandar kiredi.
Resei bolsa naqty qansha áskerin joǵaltqany jóninde resmi málimet bermei otyr.
