Ýkraina prezidenti Vladimir Zelenskii soǵys keler jyly aiaqtalady dep úmittenedi. "Ýkrainalyqtar keler jyly da yqpaldy bolady dep senemin, biraq ol ýaqytta beibit kezeń bolady" dedi Zelenskii Politico saityna.
Bul internet basylym Ýkraina prezidentin Eýropadaǵy eń yqpaldy adam dep tanydy. Seisenbi, 6 jeltoqsanda Time jýrnaly da Zelenskiidi "Jyl adamy" dep tanyǵan edi.
Zelenskii Politico-ǵa bergen suhbatynda "Ýkraina halqyna qiyn sátte qoldaý kórsetken Eýropadaǵy barlyq dosyna alǵys aitty".
Al Resei prezidenti Vladimir Pýtin keshe, 7 jeltoqsanda "arnaiy áskeri operatsiia" (Kreml Ýkrainadaǵy soǵysty osylai atap júr, Reseide soǵys sózin qoldanǵandar jazalanady) "uzaq protsess bolýy múmkin" dedi.
Pýtin Resei áskeriniń Ýkraina aýmaǵyndaǵy jerlerdi anneksiialap alǵanyn "operatsiianyń mańyzdy nátijesi" dep atady. Al álem elderiniń basym bóligi Kremldiń Ýkrainadaǵy basyp alǵan jerlerin Reseidiki dep moiyndamaidy.
Sondai-aq, Resei basshysy iadrolyq soǵys qaýpi ulǵaiyp kele jatqanyn aita kele, Resei "iadrolyq qarýdy ustaradai siltei beremeidi" dedi. Pýtin Resei "ulttyq qundylyqtaryn beibit jolmen qorǵaitynyn", eger bul ádis kómektespese, "ulttyq qundylyqtaryn" "qolyndaǵy barymen qorǵaitynyn" aitady.
Aita keteiik, karerasyn shoýmen, akter retinde bastaǵan Vladimir Zelenskii 2019 jyly Ýkraina prezidenti boylp sailanǵan. Resei Ýkrainaǵa basyp kirgeli Zelenskii eldiń qorǵanysyn batyl qolǵa aldy. Resei áskeri Kievti almaq bolǵanda ol qalada qalǵan. Soǵys bastalǵaly Ýkrainadan ketpedi, túrli jiyndarǵa tek videobailanyspen qatysyp júr. Zelenskii kún saiyn halyqqa videoúndeý joldap, soǵys jaily habar berip otyr.
