ۋكراينا پرەزيدەنتٸ ۆلاديمير زەلەنسكيي سوعىس كەلەر جىلى اياقتالادى دەپ ٷمٸتتەنەدٸ. "ۋكراينالىقتار كەلەر جىلى دا ىقپالدى بولادى دەپ سەنەمٸن, بٸراق ول ۋاقىتتا بەيبٸت كەزەڭ بولادى" دەدٸ زەلەنسكيي Politico سايتىنا.
بۇل ينتەرنەت باسىلىم ۋكراينا پرەزيدەنتٸن ەۋروپاداعى ەڭ ىقپالدى ادام دەپ تانىدى. سەيسەنبٸ, 6 جەلتوقساندا Time جۋرنالى دا زەلەنسكييدٸ "جىل ادامى" دەپ تانىعان ەدٸ.
زەلەنسكيي Politico-عا بەرگەن سۇحباتىندا "ۋكراينا حالقىنا قيىن سەتتە قولداۋ كٶرسەتكەن ەۋروپاداعى بارلىق دوسىنا العىس ايتتى".
ال رەسەي پرەزيدەنتٸ ۆلاديمير پۋتين كەشە, 7 جەلتوقساندا "ارنايى ەسكەري وپەراتسييا" (كرەمل ۋكرايناداعى سوعىستى وسىلاي اتاپ جٷر, رەسەيدە سوعىس سٶزٸن قولدانعاندار جازالانادى) "ۇزاق پروتسەسس بولۋى مٷمكٸن" دەدٸ.
پۋتين رەسەي ەسكەرٸنٸڭ ۋكراينا اۋماعىنداعى جەرلەردٸ اننەكسييالاپ العانىن "وپەراتسييانىڭ ماڭىزدى نەتيجەسٸ" دەپ اتادى. ال ەلەم ەلدەرٸنٸڭ باسىم بٶلٸگٸ كرەملدٸڭ ۋكرايناداعى باسىپ العان جەرلەرٸن رەسەيدٸكٸ دەپ مويىندامايدى.
سونداي-اق, رەسەي باسشىسى يادرولىق سوعىس قاۋپٸ ۇلعايىپ كەلە جاتقانىن ايتا كەلە, رەسەي "يادرولىق قارۋدى ۇستاراداي سٸلتەي بەرەمەيدٸ" دەدٸ. پۋتين رەسەي "ۇلتتىق قۇندىلىقتارىن بەيبٸت جولمەن قورعايتىنىن", ەگەر بۇل ەدٸس كٶمەكتەسپەسە, "ۇلتتىق قۇندىلىقتارىن" "قولىنداعى بارىمەن قورعايتىنىن" ايتادى.
ايتا كەتەيٸك, كارەراسىن شوۋمەن, اكتەر رەتٸندە باستاعان ۆلاديمير زەلەنسكيي 2019 جىلى ۋكراينا پرەزيدەنتٸ بوىلپ سايلانعان. رەسەي ۋكرايناعا باسىپ كٸرگەلٸ زەلەنسكيي ەلدٸڭ قورعانىسىن باتىل قولعا الدى. رەسەي ەسكەرٸ كيەۆتٸ الماق بولعاندا ول قالادا قالعان. سوعىس باستالعالى ۋكراينادان كەتپەدٸ, تٷرلٸ جيىندارعا تەك ۆيدەوبايلانىسپەن قاتىسىپ جٷر. زەلەنسكيي كٷن سايىن حالىققا ۆيدەوٷندەۋ جولداپ, سوعىس جايلى حابار بەرٸپ وتىر.
