Prezident Vladimir Zelenskii Ýkrainada memlekettik tóńkeris jasaý jóninde sóilesken reseilikterdiń aýdiosy qolyna túskenin málimdedi. Aýdioda ýkrainalyq kásipker Rinat Ahmetovtiń de aty atalady, dep habarlaidy Azattyq.
Zelenskiidiń aitýynsha, jazbada Ahmetovtiń familiiasy atalǵanmen kásipkerdiń ózi áńgimege aralaspaǵan. Bul oǵan "jala jabý úshin" de taratylǵan bolýy múmkin dep sanaidy.
"1 jeltoqsanda bizdiń elde memlekettik tóńkeris bolady degen aqparat tústi. Qolymyzda jazba da bar. Onda Ýkraina men Resei ókilderi Rinat Ahmetovtiń memlekettik tóńkeriske qatysyn talqylaidy. Bul jala jabý. Kásipkerdi Ýkrainaǵa qarsy soǵysqa aralastyryp jatyr. Óz halqyńa, halyq sailaǵan prezidentke qarsy soǵysýǵa bolmaidy. Ahmetovtiń aqparatyn tyńdaý úshin prezident keńsesine shaqyramyn" dedi Zelenskii jýrnalisterge.
Rinat Ahmetov – Forbes jýrnaly boiynsha Ýkrainadaǵy eń aýqatty adam. Jýrnal onyń bailyǵyn 7,6 mlrd dollarǵa baǵalaidy. Mordoviiada týǵan, keiin ata-anasymen birge Donetskige kóship barǵan. Buryn ol aimaqtaǵy partiialar jáne Viktor Ianýkovichpen tyǵyz qarym-qatynasta bolǵan, alaida 2014 jylǵy oqiǵadan keiin Donbastaǵy reseishil urandardy qoldamady.
Keiingi kezde Ahmetovtiń Zelenskii ainalasyndaǵy adamdarmen kelispei qalǵany jóninde habar taraǵan. Ahmetovtiń mediaresýrstary oppozitsiialyq saiasatkerlerge kómektesip, qazirgi prezidenttiń áreketin synaǵany jóninde de aqparat bolǵan.
Ahmetovtiń tanysy, Resei prezidenti Vladimir Pýtinge jaqyn ýkrainalyq saiasatker Viktor Medvedchýk elde memleketke opasyzdyq jasady jáne terroristik uiymnyń isine aralasty degen kúdikke ilingen.
Tergeý organdarynyń boljamynsha, ol 2014-2015 jyldary Donetsk jáne Lýganskidegi separatisterden "kómir otynyn tasymaldaý boiynsha qylmystyq shemany júzege asyrdy" degen kúdikke ilingen. Depýtat sol boiynsha Resei biligine esep bergen degen boljam aitylady. Tergeý oryndarynyń pikirinshe, onyń áreketi Ýkrainanyń energetika qaýipsizdigine nuqsan keltirgen.
Joǵarǵy rada depýtaty Viktor Medvedchýk biyl mamyr aiynda basqa is boiynsha úiqamaqqa alynǵan. Ol ózi jetekshilik etetin "Oppozitsionnaia platforma – Za jizn" fraktsiiasynyń taǵy bir depýtaty Taras Kozakov ekeýi memleketke satqyndyq jasady jáne ult bailyǵyn tonaýǵa tyrysty degen kúdikke ilingen. Tergeý organdarynyń málimetinshe, olar anneksiialanǵan Qyrym mańynda munai jáne gaz óndirý máseleleri boiynsha Reseimen astyrtyn bailanys ornatqan, odan bólek Resei arnaiy qyzmetine memlekettik qupiia bolyp sanalatyn aqparat bergen.
