Ýkraina prezidenti Vladimir Zelenskii ýkrainalyq áskeriler 1 qyrkúiekten beri Harkov jáne Herson oblysynda aýmaǵy myń sharshy kilometrden asatyn ondaǵan eldimekendi bosatqanyn málimdedi. Bul týraly ol soǵystyń 197 kúnine arnalǵan video málimdemesinde aitty.
1 qyrkúiekten bastap Ýkraina qarýly kúshteri Harkov jáne Herson oblysynda Resei okkýpatsiialap alǵan jerlerdi qaitarý úshin qarymta shabýylǵa shyqqan edi.
Zelenskii Ýkraina áskerileri qai eldimekenderdi azat etkenin naqty atamady, biraq Prezidenttiń telegram kanalynda Ýkraina qarýly kúshteri Harkov oblysyndaǵy Balaklei qalasyn bosatqany habarlandy. Onda ýkrainalyq áskerilerdiń Balakleige Ýkraina týyn tikken videosy jariialanǵan.
"Bári óz ornyna keldi. Ýkraina týy erkin aspanymyzda, Ýkrainanyń erkin qalasynda jelbiredi" - dep jazdy ol Telegram kanalynda.
Ýkraina qarýly kúshteri 9 qyrkúiektegi tańǵy habarlamasynda Balaklei qalasyn azat etý týraly "áskeriler Harkov oblysyndaǵy qarymta shabýyly sátti bolyp jatyr. Qarýly kúshter jergilikti turǵyndardyń qoldaýymen úsh kúnde 50 shaqyrymǵa jyljydy. Barlaýdyń dereginshe, qarsylastyń bólimsheleri aitarlyqtai shyǵynǵa ushyrady. Okkýpanttar [Balaklei aýdanyndaǵy] Olhovatka jáne Borodoiarskoe eldimekeninde jaralanǵan áskerileri men synǵan tehnikalaryn alyp ketýge tyrysyp jatyr" dedi.
Resei qorǵanys ministrligi Ýkraina áskeriniń Harkov oblysyndaǵy shabýyly jaily eshteńe aitpady. Vedomstvo 8 qyrkúiektegi habarlamasynda Bakalei aýdanynda Ýkrainanyń raketa-artilleriialyq qarýlarynyń qoimasyn joiǵanyn aitqan.
