Ýkraina Prezidenti Vladimir Zelenskii 12 reseilik tutqynǵa raqymshylyq jasaý týraly Jarlyqqa qol qoidy. Olar Kiev pen Máskeý arasyndaǵy tutqyndar almastyratyn orynǵa jetkizilgen. Bul aqparatty Facebook-taǵy paraqshasynda advokat Valentin Rybin habarlady.
Zańgerdiń aitýynsha, bir reseilik tutqynǵa raqymshylyq jasalmaǵan, arnaiy orynǵa da jetkizilmegen. Rybinniń aitýynsha, bul - Ýkraina shyǵysyndaǵy qaqtyǵys kezinde separatister qatarynda soǵysqan, sol úshin 15 jylǵa sottalǵan Rýslan Gadjiev.
Buǵan deiin Resei Prezidenti Vladimir Pýtin eki el arasyndaǵy tutqyndarmen almasý boiynsha kelissózdiń aiaqtalýǵa az qalǵanyn málimdegen. Biraq eki eldiń naqty qashan almasatynyn ashyp aitpaǵan. Onyń baspasóz hatshysy Dmitrii Peskov ta ol jaily tis jarmady. Qupiia derekkózine súiengen "Interfakstiń" habarlaýynsha, 7 qyrkúiekte eki el bir-birine azamattaryn tapsyrýy múmkin.
Resei biligi Ýkrainada naqty kimderdiń bosatylýy múmkin ekenin aitpady. Boljam boiynsha, olardyń biri Ýkrainadaǵy RIA Novosti agenttiginiń bas redaktory Kirill Vyshinskii bolýy múmkin. Jaqynda Ýkraina soty ony bosatqan. Al Reseide bosatylýy múmkin azamattar arasynda ýkrainalyq rejisser Oleg Sentsov, ótken jyldyń aiaǵynda Kerch buǵazynda reseilik áskeriler ustaǵan ýkrainalyq teńizshiler de bar. Keibir derekkózder teńizshilerdiń barlyǵy bosatylmaýy múmkin dep boljaidy.
Túrli derek boiynsha, Máskeý men Kiev ózara 33-35 tutqynmen almasýdy kózdep otyr.
