Ýkraina prezidenti Vladimir Zelenskii Resei men Belarýs odaq qursa, Ýkrainaǵa qaýip tóndirýi múmkin dep sanaidy. Zelenskii bul jóninde Frankfurter Allgemeine Zeitung basylymyna bergen suhbatynda aitqan. Suhbat 31 mamyrda jariialandy.
"Resei men Belarýstiń yntymaqtastyqty arttyryp otyrǵanyna kýá bolyp otyrmyz. Olar qorǵanys salasynda birikse, bizge qatty qysym jasaýy múmkin" dedi Zelenskii. Onyń sózinen TASS agenttigi úzindi keltirdi.
"Bul turǵyda Resei men Belarýs naǵyz odaqtas memleketterge ainalýy múmkin, osyndai qaýip kórip turmyn" dedi Zelenskii.
Azattyqtyń Orys qyzmetiniń jazýynsha, Ýkraina prezidentiniń bulaisha málimdeme jasaýyna sońǵy oqiǵalar áser etken bolýy múmkin:
- 2021 jyldyń 4 aqpanynda reseilik BAQ ókilderimen kezdesý kezinde Vladimir Pýtin "Qalai bolǵanda da Donbasty tastamaimyz" dep málimdedi.
- Naýryz aiynyń sońynda Resei "áskeri daiyndyqty tekseremiz" degen jeleýmen Ýkrainamen shekarada áskerin kóbeitti.
- Sáýir ortasyna deiin shekara mańyna shoǵyrlanǵan ásker 103 myńnan asty. Ýkraina áskeri aidyń sońyna deiin olardyń sany 110 myńǵa deiin jetedi dep boljaǵan.
- 13 sáýirde AQSh prezidenti Djo Baiden Resei basshysy Vladimir Pýtinmen telefon áńgimede AQSh Ýkrainanyń egemendigi men territoriialyq tutastyǵyn budan ári qarai da qoldai beredi dep atap ótti. Sáýir aiynda The Sunday Times basylymyna bergen suhbatynda britandyq barlaý qyzmetiniń jańa basshysy Richard Mýr Ulybritaniia men AQSh-tyń Resei Ýkrainaǵa basyp kirgen jaǵdaida saldary aýyr bolady dep eskertkenin rastady.
- Azattyq
