© Reuters
Ýkraina prezidenti Vladimir Zelenskii Reuters jáne CNN basylymdaryna bergen suhbatynda Resei prezidenti Vladimir Pýtinmen kelissózderge daiyn ekenin aitty. Tolyq videosuhbat Ýkraina prezidentiniń Facebook-tegi paraqshasynda jariialandy, - dep habarlaidy Tengrinews.kz tilshisi "Ýkrainskaia pravda" basylymyna silteme jasap.
"Álem Resei Federatsiiasy Prezidentin kelissóz ústeline otyrǵyzý kerek ekenin túsinedi, al men olarmen kelissóz ústeline otyrýǵa áli daiynmyn", - dedi Zelenskii.
Sonymen qatar, Memleket basshysy kelissózderdi bastaý úshin Resei tarapyna qoiar aldyn ala shartyn atady. "Biz, eń bolmaǵanda, adamdardy bombalaýdy toqtatýymyz kerek, tek bombalaýdy toqtatyp, sodan keiin kelissóz ústeline otyrýymyz kerek", - dedi ol.
Zelenskii ýkrainalyqtar "ómiriniń sońyna deiin" kúresetinin aitty. "Sebebi biz óz úiimizdemiz. Biz balalardy úide qorǵaimyz. Biz muny shyn júrekten jasaimyz. Biz ózimizdiń balalarymyzdyń bolashaǵy úshin bárin qorǵaýǵa tiispiz dep esepteimin", - dedi prezident.
Zelenskii sonymen birge NATO elderin Ýkrainanyń áskeri odaqqa múshelikke múmkindigi bar-joǵyna naqty jaýap berýge shaqyrdy. Eger odaq mundai perspektivaǵa daiyn bolmasa, onda prezident NATO elderi Ýkrainanyń qaýipsizdigine, onyń aýmaǵy men shekaralarynyń myzǵymastyǵyna zańdy kepildik berýi kerek dep atap ótti.
