Ýkraina prezidenti Vladimir Zelenskii juma kúngi kezekti videomálimdemesinde NATO-ny "álsizdigi úshin" kinálap, uiym músheleri arasynda birlik joǵyn alǵa tartty. NATO Kievtiń Ýkraina áýe keńistigin "ushpaityn aimaq" jasaý (iaǵni, Ýkraina áýe keńistigine kirgen barlyq reseilik ushaqtar men zymyrandardy atyp túsirý) týraly usynysynan bas tartqan, dep habarlaidy Azattyq.
NATO ókilderi Kievtiń usynysyn oryndaý is júzinde Reseimen soǵysýmen para-par dep málimdegen edi.
Al Zelenskii bulaisha alańdaýǵa negiz joq, sebebi Resei Soltústikatlantikalyq odaqpen qaqtyǵysqa bara qoimaidy dep sanaidy.
"Búginnen bastap opat bolǵan adamdardyń barlyǵy sizder úshin qaza tabady... Búgin NATO basshylyǵy ýkraina qalalary men eldi mekenderin bombalaýǵa "jol bergendei" boldy" dedi Zelenskii.
Ol "álsiz" NATO-ǵa qaraǵanda Eýroodaqtyń áldeqaida aýyzbirlik tanytyp, Reseige qatań sanktsiia salǵanyn, Ýkrainaǵa qarý-jaraqpen kómekteskenin atap ótti.
NATO elderiniń syrtqy ister ministrleri 4 naýryzda Ýkrainanyń áýe keńistigin "ushpaityn aimaq" jasaý týraly usynysynan bas tartqan. Olar NATO Reseimen soǵysýǵa umtylmaitynyn, eger Kiev usynysyn oryndasa sondai qaýip týyndaitynyn aitqan.
Resei basshysy Vladimir Pýtinniń sózine qaraǵanda, Ýkrainanyń NATO-ǵa qosylý yqtimaldyǵy - onyń Ýkrainaǵa basyp kirýine negiz bolǵan sebepterdiń biri. Pýtin bul Reseige qaýipti degen. Al Ýkraina biligi keiingi kezde qaýipsizdik týraly kepildikke qol jetkizse, NATO-ǵa qosylý josparynan bas tartýy múmkin ekenin de aityp keledi.
Juma kúni kúndiz Zelenskii Ýkrainany qoldaý aktsiiasy ótken Eýropanyń jeti qalasynyń turǵyndaryna onlain arqyly shyǵyp, sóiledi. Ol Eýropa azamattaryn Ýkrainany qoldaýǵa úndegen. Ol eger Ýkraina "jeńilse", kelesi kezek Eýropanyń ózge elderine keletinin alǵa tartqan.
