Ýkraina prezidenti keńsesiniń keńesshisi, Reseimen kelissóz boiynsha ýkrain delegatsiiasynyń múshesi Mihil Podoliak Resei Ýkraina aýmaǵynan áskerin áketpeiinshe, Kiev atysty toqtatý týraly kelisimge barmaitynyn aitty, dep habarlaidy Azattyq.
Resei áskeri "elden ketýi tiis, tek sodan keiin ǵana beibit protsesti qalpyna keltirý múmkin bolady" dedi Podoliak. Onyń sózinen Reuters agenttigi úzindi keltiredi.
Ol talaptardyń arasynda Máskeý anneksiialap alǵan Qyrymnyń bar-joǵyn aitpady.
Qyrym men Donbastyń bir bóligi 24 aqpanǵa deiin de reseishil kúshterdiń qolynda bolǵan. Osyǵan deiin Ýkraina basshysy Vladimir Zelenskii Resei áskeri 23 aqpan kúngi pozitsiiasyna oralsa ǵana kelissózge baratynyn aitqan. Podoliak sekildi Zelenskii de Máskeýge Ýkraina territoriiasyn bermeitinin aitqan.
Podoliaktyń sózine qaraǵanda, áskerin elden shyǵarmaǵan Resei úzilis jasaǵan saiyn kúshin qalpyna keltirip, burynǵydan beter ekpindi soqqymen oralady. Prezident keńesshisi Kievtiń pozitsiiasy barǵan saiyn "qataiyp" bara jatqanyn moiyndady. Osyǵan deiin Resei taraby beibit kelissóz is júzinde múlde júrgizilip jatqan joq degen edi.
Podoliak birqatar batys elderiniń atysty dereý toqtatý týraly úndeýin "aqylǵa qonymsyz" sanaidy. Osyǵan deiin Italiianyń burynǵy premer-ministri Silvio Berlýskoni sondai málimdeme jasaǵan. New York Times basylymy Ýkraina joǵaltyp alǵan territoriiasyn endi qaitara almaidy dep tujyrymdaǵan. Mihail Podoliak Resei "aýyr jeńiliske ushyraýy úshin" Batys Ýkrainany qoldai berýi tiis dep esepteidi.
Ýkrainada soǵystyń júrip jatqanyna úsh aiǵa jýyqtady. Resei biligi ony "arnaiy operatsiia" dep ataǵan. Resei áskeri Ýkrainanyń ońtústigindegi birqatar oblystardy baqylaýyna alyp, olardyń Azov teńizimen bailanysyn úzgen. Olar Kievten ketýge májbúr boldy. Qazir shaiqas Ýkraina shyǵysyndaǵy negizinen Lýgansk jáne Donetsk oblystarynda júrip jatyr.
