Osy aptanyń ortasynda Resei kúshterinen azat etilgen aýdandardy aralaǵan Ýkraina prezidenti Vladimir Zelenskii qalalar men eldimekenderdiń qatty qiraǵanyn aitty, dep habarlaidy Azattyq.
Ulybritaniia qorǵanys ministrligi 15 qyrkúiekte jariialaǵan kezekti habarlamasynda Resei kúshteriniń soqqysyna qaramastan, ýkrain kúshteriniń Harkov oblysynda azat etilgen aýdandarda baqylaýyn kúsheitkenin jazdy. 14 qyrkúiekte Zelenskii azat etilgen strategiialyq Iziým qalasyna saparynda Ýkrainaǵa "jeńis" áperýge ýáde berdi.
"Kók-sary tústi jalaýymyz azat etilgen Iziým qalasynda jelbirep tur. Árbir ýkrain qalasy men aýylynda solai bolady. Biz tek bir baǵytta ǵana – jeńiske qarai jyljyp kelemiz " dedi Zelenskii áleýmettik jelide jariialaǵan jazbasynda.
Sársenbi kúni túnde jariialaǵan videosynda Zelenskii ýkrain kúshteri bes kún ishinde 110 shaqyrymǵa alǵa jyljyǵanyn atap ótti.
14 qyrkúiekte keshke Resei kúshteri ortalyq Ýkrainadaǵy eń iri qala Krivoi Rogqa zymyranmen soqqy jasap, sonyń saldarynan qaladaǵy sý bógeti qiraǵan. Ózen deńgeii birneshe metrge kóterilip, qala turǵyndaryna sel qaýpi tóngen.
Zelenskii 15 qyrkúiekte jariialaǵan videosynda Karachýnov bógetiniń qiraǵanyn aitty. Onyń sózinshe, sý bógeniniń áskerge qatysy joq jáne qalanyń júzdegen myń turǵyny sol sý júiesine táýeldi bolǵan.
Resei qorǵanys ministrligi shabýylǵa túsinikteme bermegen. Kóp dálelderge Máskeý Ýkrainadaǵy azamattyq nysandarǵa soqqy jasaǵanyn moiyndamai keledi. Kremlshil blogerler Resei kúshteri sý bógetine soqqy jasaý arqyly ýkrain armiiasynyń qozǵalysyn qiyndatqysy keledi dep jazdy. Bul aqparatty táýelsiz derekkózder rastaǵan joq.
Video: Ýkrain kúshteri azat etilgen aýdandardy minalardan tazartyp jatyr (14 qyrkúiek, 2022 jyl. "Nastoiashee vremia" videosy).
