Jalpyulttyq sotsial-demokratiialyq partiia (JSDP) jetekshileriniń biri Záýresh Battalova Azattyqqa atalǵan partiiadaǵy qyzmetin ne úshin doǵaratynyna qatysty taiaý kúnderi arnaiy málimdeme jasaitynyn aitty. Battalova JSDP partiiasynan shyǵatynyn keshe, sáýirdiń 26-sy kúni Facebook áleýmettik jelisinde habarlaǵan.
Búgin, sáýirdiń 27-sinde Azattyq tilshisimen sóilesken Battalova JSDP qatarynan ne úshin shyǵatyny jaily taiaý kúnderi arnaiy málimdeme jasaitynyn, ázirge kúte turatynyn aitty. Onyń sózinshe "JSDP partiiasynyń jumysynan kóńili qalǵan".
Burynǵy senat depýtaty, "Qazaqstanda parlamentarizmdi damytý" qorynyń prezidenti Záýresh Battalova 2017 jyldyń basynda Jalpy ulttyq sotsial demokratiialyq partiianyń atqarýshy organy – tóralqa tóraiymy bolyp sailanǵan. JSDP tóraǵasy Jarmahan Tuiaqbai Záýresh Battalovanyń jańa qyzmetin "partiiadaǵy bilikti bólisý, bilikti birtindep keiingi býynǵa ótkizý" dep baǵalaǵan.
Azattyq tilshisiniń JSDP tóraǵasy Jarmahan Tuiaqbaimen sóilesýge múmkindik bolmady. JSDP-nyń Almaty qalasy boiynsha filialynyń tóraǵasy jáne partiia tóralqasy tóraiymynyń orynbasary Tazabek Sámbetbaidyń aitýynsha, partiia basshylyǵy arasynda kikiljiń joq. Partiia tóraǵasy Jarmahan Tuiaqbai partiia tóralqasynyń jumysyna shekteý qoimaǵan, aralaspaǵan.
Tazabek Sámbetbaidyń sózinshe, "JSDP-nyń ishinde býyn almasý protsesi" júrip jatyr. Basqarýshy organy – saiasi keńesiniń jáne bólimsheleri men ókildikteri basshylarynyń jartysynan astamy jastar. Osyǵan bailanysty burynǵy býyn men keiingi býyn arasynda kózqaras qaishylyǵy baiqalǵan".
Bilikke oppozitsiialyq baǵytty ustanatynyn jariialaǵan Jalpy ulttyq sotsial demokratiialyq partiiasy 2006 jyly kúzde qurylyp, tóraǵalyǵyna Jarmahan Tuiaqbai sailanǵan. 2009 jyly "Naǵyz Aq jol" partiiasymen birigip, kóp uzamai qaita bólingen.
