Halyqaralyq jastar kúnine orai QR Premer-Ministriniń orynbasary – Mádeniet jáne aqparat ministri Aida Balaeva jastarǵa quttyqtaý joldady, dep habarlaidy ult.kz.
Ministrdiń aitýynsha, búginde Qazaqstanda 5,8 mln-nan astam jas azamat bar. Bul el halqynyń úshten birine jýyq bóligin quraidy.
Aida Balaeva jastardyń bilim alýy, jumysqa ornalasýy, kásip bastaýyna jáne baspanaly bolýy úshin memlekettik qoldaý sharalary kúsheitilgenin atap ótti.
«Naýryz» jáne «Otaý» jeńildetilgen nesie baǵdarlamalary arqyly 5,4 myńnan astam jas qazaqstandyq qoldaýǵa ie bolǵan. Al óńirlik turǵyn úi baǵdarlamalary aiasynda 7,2 myńnan astam jas otbasy men jas maman baspanaly boldy.
Sonymen qatar biyl «Jasyl el» jobasy boiynsha 35 myńnan astam jas maýsymdyq jumyspen qamtylǵan.
Elimizde jastardyń bastamalaryn qoldaityn 400-den astam jastar uiymy jáne 235 jastar resýrstyq ortalyǵy jumys isteidi.
Ministr jastardyń tsifrlyq tehnologiialar, jasandy intellekt, ǵylym jáne tehnologiialyq kásipkerlik salalaryndaǵy róline de toqtaldy. Onyń pikirinshe, jańa tehnologiialardy meńgerip, tyń ideialar usyný arqyly jas urpaq Qazaqstannyń básekege qabilettiligin arttyrýǵa úles qosa alady.
Aida Balaeva jastardyń el ómirine belsendi aralasýy mańyzdy ekenin aityp, olardyń volonterlik, áleýmettik jáne qoǵamdyq bastamalarǵa qatysyp júrgenin atap ótti.
«Sizderdiń bilimderińiz ben jigerlerińiz, jaýapkershilikterińiz ben jańalyqqa umtylystaryńyz – Qazaqstannyń keleshegine salynǵan eń úlken kapital. Biz sizderge senemiz», – dedi ministr.
Búginde jastar sanatyna 35 jasqa deiingi azamattar engizilgen.
