Qytaidyń Star.Vision kompaniiasy Ózbekstannyń tarihyndaǵy alǵashqy Samarkand-2028 giperspektraldy jerserigin sátti ushyrdy. Jerserik Qytaidyń Shandýn provintsiiasy jaǵalaýyndaǵy teńiz platformasynan ǵaryshqa jiberildi. Bul týraly Ózbekstannyń Tsifrlyq tehnologiialar ministrligi habarlady.
Samarkand-2028 jerseriginiń basty ereksheligi – onyń borttyq júiesine Ózbekstanda ázirlengen jasandy intellekt modýli ornatylǵan. «Uzbekcosmos» agenttiginiń mamandary jasaǵan bul tehnologiia giperspektraldy derekterdi tikelei orbitada óńdeýge múmkindik beredi. Sonyń arqasynda aqparatty berý jáne keiingi taldaý áldeqaida tiimdi bolady.
Jerserikpen birge Qytaidyń Lampung-1 apparaty da ushyryldy. Eki jerseriktiń de ushyrylymy shtattyq rejimde ótti.
Ózbekstan biliginiń málimetinshe, bul joba eldiń ulttyq ǵarysh baǵdarlamasyndaǵy eń iri halyqaralyq bastamalardyń biri sanalady. Sonymen qatar, ol Ózbekstan men Qytai arasyndaǵy ǵylymi-tehnologiialyq yntymaqtastyqty jańa deńgeige kóteredi.
Samarkand-2028 aýyl sharýashylyǵy, ekologiia, qala qurylysy jáne basqa da strategiialyq salalarda zamanaýi tehnologiialardy qoldaný múmkindigin keńeitedi. Sondai-aq jerserik tabiǵi resýrstardy baqylaýǵa, sý qorlaryn basqarýǵa, tótenshe jaǵdailardyń aldyn alýǵa jáne Jer betin zertteýge kómektesedi.
Aita keteiik, Samarkand-2028 ataýynyń simvoldyq máni bar. 2028 jyly Halyqaralyq astronavtika kongresi (IAC) Samarqand qalasynda ótedi, al jerserik ataýy osy tarihi oqiǵaǵa orai berilgen.
