Memlekettik keńesshi Erlan Qarinniń tóraǵalyǵymen ótken Shetelde kadrlar daiarlaý jónindegi respýblikalyq komissiianyń kezekti otyrysynda 184 qazaqstandyqqa «Bolashaq» halyqaralyq stipendiiasyn berý týraly sheshim qabyldandy, dep habarlaidy ult.kz.
Konkýrs qorytyndysy boiynsha stipendiia iegerleriniń 137-si sheteldik joǵary oqý oryndarynyń magistratýra baǵdarlamalarynda, 10-y doktorantýrada bilim alady. Al 37 qazaqstandyq jetekshi sheteldik ýniversitetter men ortalyqtarda kásibi taǵylymdamadan ótedi.
Biylǵy irikteýdiń basty erekshelikteriniń biri – jasandy intellekt salasyndaǵy mamandarǵa arnalǵan alǵashqy «Bolashaq» stipendiialarynyń taǵaiyndalýy boldy. Eske salsaq, ótken jyldyń sońynda Respýblikalyq komissiia bul baǵyttaǵy kásibi taǵylymdamalar úshin arnaiy sanat engizgen bolatyn.
Sonymen qatar komissiia sheshimimen 51 qazaqstandyq álemniń jetekshi ǵylymi jáne zertteý ortalyqtarynda ǵylymi taǵylymdamadan ótýge grant aldy.
Otyrys barysynda daryndy jastardy qoldaýǵa baǵyttalǵan jańa ózgerister de maquldandy. Endi «Bolashaq» baǵdarlamasy boiynsha bakalavriat deńgeiinde bilim alýǵa úmitkerler qataryna halyqaralyq shyǵarmashylyq baiqaýlardyń jeńimpazdary men júldegerleri de engizildi.
Buǵan deiin mundai múmkindik tek halyqaralyq pándik olimpiadalar men ǵylymi jobalar baiqaýlarynyń jeńimpazdary men júldegerlerine beriletin.
Memlekettik keńesshi Erlan Qarin otyrys barysynda «Bolashaq» halyqaralyq stipendiiasyn odan ári jetildirý jáne baǵdarlamanyń tiimdiligin arttyrý boiynsha birqatar naqty tapsyrma berdi.
Málimetke sáikes, biylǵy konkýrsqa qyzyǵýshylyq joǵary bolǵan. Orta eseppen bir stipendiialyq orynǵa alty úmitkerden kelgen.
