Aqmola oblysynda karerlik jumystarǵa arnalǵan jarylǵysh zattardy tasymaldaǵan júk kóligi qatysqan jol apatynan eki adam qaza tapty, dep habarlaidy ult.kz.
Oblystyq politsiia departamentiniń málimetinshe, qaiǵyly oqiǵa 16 maýsym kúni tańǵy saǵat 07:00 shamasynda Astana – Atbasar – Jaqsy avtojolynyń 231-shaqyrymynda, Bastaý aýyly mańynda bolǵan.
Aldyn ala derek boiynsha, 1996 jyly týǵan Chevrolet Tracker júrgizýshisi kólikti basqara almai, qarsy qozǵalys jolaǵyna shyǵyp ketken. Sonyń saldarynan ol 1973 jyly týǵan azamat basqarǵan "KamAZ" júk kóligimen betpe-bet soqtyǵysqan.
Jol apaty saldarynan jeńil kóliktiń júrgizýshisi men 1978 jyly týǵan jolaýshy áiel oqiǵa ornynda kóz jumdy.
Atalǵan fakti boiynsha sotqa deiingi tergeý bastaldy.
Politsiianyń habarlaýynsha, jarylǵysh zattardy tasymaldaǵan "KamAZ" júrgizýshisinde qaýipti júk tasymaldaýǵa qajetti barlyq ruqsat qujattary bolǵan. Oqiǵa kezinde kabinada qaýipsizdikti qamtamasyz etýge jaýapty kúzetshi de bolǵan.
