QR Prezidentiniń janyndaǵy Qazaqstan strategiialyq zertteýler institýtynyń direktory Ulttyq qoǵamdyq senim keńesiniń V otyrysynda kóterilgen áleýmettik sala men adami kapitaldy damytý jónindegi máselelerge nazar aýdardy. Sarapshy solardyń ishinde múmkindigi shekteýli jandar men erekshe qajettilikteri bar balalardyń jaǵdaiyn jasaý mańyzdy másele ekenin aitady, dep habarlaidy QazAqparat.
«Qazaqstanda erekshe bilim berý qajettilikteri bar balalar sany kúnnen kúnge ósip kele jatyr. Alaida olarǵa arnalǵan bilim berý salasynyń damýynda, ony uiymdastyrýda, jalpy infraqurylymynda áli de kemshilikter bar ekeni belgili. Ol óte ózekti másele. Óitkeni, erekshe qajettilikteri bar balalardy qoǵamǵa barynsha beiimdeý – memlekettegi áleýmettik jaǵdaidyń mańyzdy bir kórsetkishi. IýNISEF halyqaralyq uiymnyń málimeti boiynsha Shyǵys jáne Ortalyq Eýropa men Ortalyq Aziia elderindegi densaýlyq múmkindikteri shekteýli 5,1 million balalardyń kem degende 75 protsenti sapaly inkliýzivti bilim berý múmkindikterine qol jetkize almai otyr», - deidi ol.
Zarema Shaýkenova keltirgen resmi statistika boiynsha elimizde 161 156 bala arnaiy bilimdi qajet etedi. Respýblika boiynsha 420 arnaiy bilim berý uiymy, onyń ishinde 195 psihologiialyq-pedagogikalyq túzetý kabineti, 98 arnaiy mektep, 14 ońaltý ortalyǵy jáne 38 arnaiy mektepke deiingi uiym, 75 psihologiialyq-meditsinalyq-pedagogikalyq konsýltatsiia (PMPK) jumys isteidi.
«Prezident Qasym-Jomart Toqaev keńes otyrysynda bul problemany ashyq aityp, osyndai arnaiy uiymdar men mekemelerdiń qyzmet etý jónindegi normalarynyń eskirgenine erekshe toqtaldy. Bul normalar erekshe qajettilikteri bar balalardyń ómirin qiyndata túsýde. Ońaltý ortalyqtary, arnaiy meditsinalyq qyzmetter, arnaiy bilim berý men inkliýzivti bilim baǵdarlamalary is júzinde qyzmetin atqarǵanymen, olardyń sany jetkilikiz, balalar sol sebepti ailar, jyldar boiyna óz kezegin kútip otyrýǵa májbúr. Aimaqtyq ta erekshelikter bar. Osy oraida Memleket basshysy Q.Toqaev bul saladaǵy normativterdi aimaqtyq erekshelikter men zamanaýi standarttardy eskere otyryp jańartýdy tapsyrdy», - deidi sarapshy.
Zarema Shaýkenova inkliýzivti qoǵamdy damytýdaǵy mańyzdy qadamdardyń biri – múmkindigi shekteýli adamdarǵa barynsha qolaily jaǵdai jasaý ekenin atap ótti. Bul oraida múmkindigi shekteýli azamattardyń turǵyn-úi, áleýmettik jáne transporttyq infraqurylymy obektilerine kedergisiz qoljetimdiligin qamtamasyz etý ózektene túsýde.
«Barlyq sanattaǵy múgedektikti anyqtaý rásimderin jeńildetý, kútimge muqtaj adamdardyń ózine tiesili áleýmettik qyzmetterdi paidalanýy boiynsha jumystardy júielep, qazirgi tsifrlyq standarttarǵa sai jetildirý qajettigi artýda. Osyǵan orai Prezidenttiń Densaýlyq saqtaý, Bilim berý jáne Eńbek jáne halyqty áleýmettik qorǵaý ministrlikteriniń vedomstvoaralyq ózara is-áreketin negizge ala otyryp, Biryńǵai aqparattyq bazany qurý arqyly ońtaily júieni jasaý jónindegi tapsyrmasy qajetti ári ýaqytyly ekeni anyq. Sondai-aq, Memleket basshysy múmkindigi shekteýli azamattardyń qajet etilgen obektilerge kedergisiz kirýdi qamtamasyz etý maqsatynda jergilikti atarýshy organdarǵa qajet etilgen barlyq obektilerdiń kartasyn daiyndaýdy tapsyrdy. Ol óte mańyzdy, sebebi obektilerdiń qoljetimdiligi problemasy týraly múmkindigi shekteýli jandardyń ózi de, olardyń quqyqtaryn qorǵaýshy uiymdar da, úkimettik emes uiym ókilderi de árdaiym aityp júr», - dep túidi Zarema Shaýkenova.
Aita ketsek Ulttyq qoǵamdyq senim keńesiniń búgin ótken otyrysynda Memleket basshysy Qasym-Jomart Toqaev erekshe qajettiligi bar balalardy qoldaýǵa qatysty elimizdiń Bilim jáne ǵylym ministrligine tapsyrma bergen bolatyn.
