Otandyq joǵary oqý oryndarynda oqityn zańgerler kóp, biraq ókinishke qarai, zańgerlik bilimniń sapasy kóńil kónshitpei otyr. Senator Lázzat Súleimen óziniń Úkimet basshysynyń atyna joldaǵan depýtattyq saýalynda osy máseleni kóterdi, dep habarlaidy "Ult aqparat".
«Bilim jáne ǵylym ministrliginiń málimetine sáikes, elimizdiń 113 joǵary oqý ornynyń 71-i zańger mamandaryn daiarlaidy. Onyń ishinde agrarlyq, pedagogikalyq, qarjylyq, temirjol, innovatsiialyq baǵyttaǵy oqý oryndary da zańgerler daiarlaýda. Vedomstvolyq oqý oryndary daiarlaǵan mamandardy qospaǵanda, joǵary oqý oryndary sońǵy 5 jylda 107 278 zańger maman diplom alǵan. Sarapshylardyń pikirinshe, zańgerlik bilim sapasy tipti syn kótermeidi», - dedi Lázzat Súleimen.
Senatordyń pikirinshe, bul saladaǵy jalǵyz problema emes. Quqyqtaný salasynda arnaiy kásibi standarttyń joqtyǵy, professorlyq-oqytýshylyq quramnyń tapshylyǵy, sondai-aq oqý jáne ǵylymi protsesterdi úilestirýdiń bolmaýy bolashaq zańgerlerdi daiarlaý sapasyna teris áser etedi.
Senator jaǵdaidy jaqsartý úshin birqatar bastamany engizý múmkindigin qarastyrýdy usyndy. Atap aitqanda, zańgerlerdi oqytatyn oqý oryndaryn litsenziialaý sharttaryn qatańdatý asa mańyzdy, stýdentterdiń praktikadan ótý tetikterin jetildirý jáne zańgerlik maman daiarlaýdy beiindi oqý oryndaryna berý qajet ekenin jetkizdi.
