Kúni keshe Senat depýtaty Birǵanym Áitimova Astanada ótken jiyndardyń birinde otandyq BAQ ókilderi arqyly «depýtattardy jii synaisyzdar, olardy sailaǵan ózderińiz» dep qoǵamǵa renishin bildirgen bolatyn. Al, tanymal zańger Djohar Ýtebekov senatordyń bulai deýi esh qisynǵa kelmeitinin aityp otyr.
Aita keteiik, keshe Nazarbaev Qoǵamdyq sanany jańǵyrtý boiynsha memlekettik baǵdarlamany iske asyratyn ulttyq komissiiany qurýǵa jarlyq bergen bolatyn. Munan keiin qoǵamda «depýtattardyń da sanasyn jańǵyrtý kerek» degen usynystar aityldy. Áitimova bolsa bul usynysqa kóp kúttirmei jaýap berdi.
«Depýtattardyń sana-sezimi bar, sanasy joq depýtattar bizde joq. Bizge alǵa qarai jyljý kerek, óz múddelerimizdi batylyraq qorǵaý kerek, jalpy elimizdiń múddesin qorǵaý kerek. Depýtattardy synǵa alǵandy jaqsy kóresizder, al endi men sizderge bir suraq qoiaiyn: olardy kim sailady sonda? Sailaýshylar sailady ǵoi. Sizder senatorlardy máslihat arqyly sailaisyzdar - mine, sizderge. Onda laiyqty bolatyn adamdardy sailańyzdar. Menińshe, halyq laiyqty depýtattardy sailady», - dedi Birǵanym Áitimova.
Zańger Djohar Ýtebekov bolsa, Birǵanym Áitimovany da, odan ózge senatorlardy da, tipti, Májilis depýtattaryn da halyq sailamaǵanyn aityp otyr. Bul týraly ol óziniń Facebook-paraqshasynda málimdedi.
«Konstitýtsiia boiynsha bizde 47 senator bar. Olardyń 15-in Prezidenttiń ózi taǵaiyndaidy. Áitimova - sol 15-tiń biri. Demek, ol taǵaiyndalǵan. Qalǵan senatorlardy da halyq sailaǵan joq. Olardy oblystyq máslihattaǵylar qupiia jolmen sailap aldy», - deidi zańger.
Ol sondai-aq, Májilis depýtattarynyń da partiialyq tizimmen Parlamentke ótkenin, halyqtyń bul protseske de yqpal etpegenin aitty.
«Tómengi palatada taǵy da Qazaqstan halqy assambleiasynyń atynan sailanatyn da depýtattar bar. Biraq, olardyń Qazaqstan halqyna esh qatysy joq», - dep jazdy Ýtebekov.
