Foto:elements.envato.com
Alqabilerdiń qatysýymen shyǵarylǵan úkimniń kúshi joiylyp, jańadan qaraýǵa jiberildi, dep habarlaidy "Ult aqparat" Almaty sottarynyń resmi paraqshasyna silteme jasap.
Almaty qalalyq sotynyń apelliatsiialyq satysy alqabilerdiń aiypker Nurtaevtyń is-áreketterin qasaqana adam óltirýden (QK-niń 99 b., 1 b.) qýatty psihikalyq tolqý jaǵdaiynda adam óltirýge (QK-niń 101 b.) aýystyrý týraly úkiminiń kúshin joidy.
Alqabilerdiń qatysýy arqyly shyǵarylǵan úkimniń kúshin joiýǵa myna mán-jailar negiz bolǵan:
• Sot buryn zerttemegen dáleldemelerge silteme jasaǵan qorǵaýshy tarap advokatynyń pikirtalas barysynda sóileý tártibin buzýy - iaǵni zań talaptarynyń buzylýy sot tergeýin qaita jańǵyrtýǵa ákeldi.
• Alqabilerge belgili bir zań terminderi qoldanyla otyryp, suraqtar qoiyldy. Mysaly: kenetten paida bolǵan qýatty psihikalyq tolqý jaǵdaiynda adam óltirý, buǵan zań boiynsha jol berilmeidi.
• Aiyptaýshy tarap is materialdaryna qosa berilmegen beinejazbasy bar disk túrindegi jol berilmeitin dáleldemeni usyndy, disktiń shyǵý tegi eshbir dáiekpen rastalmady, mundai disk zattyq dáleldeme dep tanylmady.
"Apelliatsiialyq satyda aiyptaýdyń dáleldenýi men dáleldenbeýin, dáleldemelerdiń dáiektiligi nemese dáieksizdigin, keibir dáleldemelerdiń basqalarynynan basymdyǵyn, sottyń qandai da bir qylmystyq zańdy qoldanýy jáne taǵaiyndalǵan jaza sharasy týraly máseleni sheshýge tyiym salynady.
Apelliatsiialyq satydaǵy sot qylmystyq jáne protsestik zańnama normalarynyń saqtalýyn tekseredi jáne osy negizde alqabilerdiń qatysýy arqyly shyǵarylǵan úkimniń zańdylyǵyn, dáleldiligin jáne ádildigin tekseredi" - delingen habarlamada.
Is júrgizý normalarynyń buzylýy negizge alyna otyryp, úkimniń kúshi joiyldy. Is jańa sot talqylaýyna jiberildi.
Aita keteiik, qylmystyq oqiǵa byltyr qazan aiynda bolǵan. Zańger áieldi burynǵy kúieýi Talǵat Nurtaev 18 jerden pyshaqtap óltirgen. Biyl 17 mamyrda sot er adamǵa 1 jyl 6 aiǵa qonys koloniiasynda jazasyn óteý týraly úkim shyǵarǵan. Sottalýshynyń áreketi Qylmystyq kodekstiń 1-bóliginiń 99-baby "Qasaqana kisi óltirý" babynan Qylmystyq Kodekstiń 101-baby "Qatty psihikalyq tolqý jaǵdaiynda kisi óltirý" babyna aýystyrylǵan.
