Búgin Májilis spikeri Nurlan Nyǵmatýlinniń tóraǵalyǵymen jalpy otyrys ótti. Onda depýtattardyń bastamasymen ázirlengen «Otbasylyq-turmystyq zorlyq-zombylyqqa qarsy is-qimyl týraly» jáne oǵan ilespe zań jobalary maquldandy, dep habarlaidy "Ult aqparat" tómengi palatanyń baspasóz qyzmetine silteme jasap.
Qujat otbasylyq-turmystyq zorlyq-zombylyqqa qarsy is-qimyl jónindegi memlekettik saiasattyń quqyqtyq, áleýmettik, institýtsionaldyq jáne uiymdastyrýshylyq negizderin jetildirý maqsatynda daiyndalǵan.
Zań jobasymen jumys isteý barysynda depýtattar turmystyq zorlyq-zombylyq salasyndaǵy is-qimyl sharalarynyń tutas júiesin qurýǵa baǵyttalǵan normalardy engizip, jaýapty organdardyń quzyretterin naqtylady.
Osy zań jobasyna orai óz pikirin bildirgen Májilis Tóraǵasy: «jasyratyny joq, sońǵy kezde elimizde turmystyq daýlar kórsetkishi ósip otyr. Shyn máninde, kez kelgen damyǵan elde, árine, oǵan jol berýge bolmaidy. Sondyqtan, tikelei, Prezidenttiń tapsyrmasyna sáikes, bizdiń depýtattar bastamashy bolyp, osy Zań jobasyn ázirledi. Osy qujattaǵy jańa normalar búkil el bolyp, halyq bolyp, qoǵam bolyp otbasyndaǵy janjalǵa qarsy kúresýge múmkindik beredi. Bul halqymyzdyń densaýlyǵy, ómiri jáne balalarymyzdyń bolashaǵy úshin óte mańyzdy másele, óte mańyzdy zań», - dep atap ótti.
Aita ketý kerek, zań jobasy arqyly quqyq buzýshylardyń zorlyq-zombylyq jáne agressiialyq minez-qulqyn ózgertý úshin psihologiialyq jaǵynan túzetý baǵdarlamasynan ótý arqyly quqyq buzýshylardy qaita áleýmettendirý jóninde sharalar engizý kózdeledi. Sondai-aq, quqyq buzýshylarǵa qatysty qorǵaý nusqamasyn shyǵarý kezinde politsiianyń olardy baqylaý jónindegi quzyretin kúsheite otyryp, ýákiletti memlekettik organdardyń quzyretterin naqtylaý usynylady.
Sonymen qatar, zardap shekkenderdiń quqyqtary men qaýipsizdik kepildikterin bekitý jáne osy saladaǵy zańnamanyń saqtalýyn qoǵamdyq baqylaý máselelerin retteýdi qarastyrady.
