Parlament Májilisinde jańartylatyn energiia kózderin paidalanýdy qoldaý jáne elektr energetikasy máseleleri boiynsha zań jobasy tanystyryldy, dep habarlaidy "Ult aqparat".
Qujatty otyrysta Májilis depýtaty Shavhat Ótemisov tanystyrdy.
«Zań jobasy manevrlik qýattar salýdy yntalandyrady. Búgingi kúni elimizde elektr qýatynyń profitsiti bar. Ol shamamen 3000 MVt quraidy. Áitse de qazirgi ýaqytta manevrlik qýattar tapshylyǵy baiqalady. Táýliktiń keshki ýaqytynda joǵarylaýyna jáne túngi ýaqyttarda tómendeýine bailanysty elektr energiiasyn birkelki tutynbaý elektr stantsiialarynyń jedel aýyspaly jumysy tártibin talap etedi. Osyǵan bailanysty zań jobasynda generatsiianyń manevrlik rejimi bar qýattardy salý úshin tartymdy jaǵdailar jasaý usynylady», - dedi Shavhat Ótemisov.
Onyń aitýynsha, bul qadam óndiris-tutyný teńgerimsizdikterin retteýdi júzege asyrýǵa múmkindik beredi.
«Bul rette jobalardy irikteýdiń aýktsiondyq tetigi qoldanylatyn bolady. Osylaisha Qazaqstannyń elektr energetikasy júiesiniń syrtqy kózderge táýeldiligi tómendeidi. Sonymen qatar retteý boiynsha kórsetiletin qyzmet úshin búgingi tańda Reseige ketip jatqan qarajaty elimizde qalady. Al bul - jyl saiyn shamamen 10-12 mlrd teńge», - dedi ol.
