Zań qabyldaý quqyǵy Májiliske tiesili bolady. Bul týraly Konstitýtsiialyq keńestiń apparat jetekshisi Baqyt Nurmuhanov aitty, dep habarlaidy QazAqparat.
«Zań shyǵarý protsesin jańǵyrtýǵa arnalǵan birqatar ózgeris jasaldy. Zań qabyldaý quqyǵy negizinen Májiliske tiesili bolady. Senatqa Májilis qabyldaǵan zańdardy maquldaý nemese maquldamaý quqyǵy beriledi. Retteitin máselelerdiń mańyzdylyǵyn eskere otyryp, Konstitýtsiialyq zańdardy palatalardyń birlesken otyrysynda qabyldaý qoldaý tapty. Úkimetke adam ómiri men densaýlyǵyna, memlekettiń qaýipsizdigine, basqa da qundylyqtarǵa airyqsha qaýip tóngen jaǵdaida zań kúshi bar normativtik-quqyqtyq aktiler qabyldaý quqyǵy berildi», - dedi ol Ortalyq kommýnikatsiialar qyzmetindegi baspasóz máslihatynda.
Onyń aitýynsha, elimizdiń Ata zańyna engiziletin túzetýler men ózgertýler jobasynyń aýqymdy bóligi adam quqyqtary máselelerine arnalǵan.
«Byltyr Qazaqstannyń Qylmystyq kodeksinen jáne basqa zańdarynan ólim jazasy alynyp tastaldy. Endi bul uǵym Ata zańnan joiylyp otyr. Osylaisha, biz Qazaqstan is júzinde de, zań júzinde de ólim jazasy joq memleket dep aita alatyn bolamyz. Ombýdsmen institýty týraly jeke bap qarastyryldy. Azamattardyń ótinish berýine jol ashyp, Konstitýtsiialyq keńesti Konstitýtsiialyq sotqa ainaldyrý bastamasyn erekshe atap ótkim keledi. Konstitýttsiialyq sot tóreligi boiynsha dúniejúzilik qaýymdastyqqa múshe 118 eldiń 78-inde Konstitýtsiialyq sot qurylǵan. 12 memlekette Konstitýttsiialyq keńes jumys isteidi. Qalǵandarynda bul fýnktsiiany Joǵarǵy sot jáne basqa organdar júzege asyrady. Osy oraida Qazaqstan álemde eń keń taraǵan jáne tiimdi modeldi tańdap otyr dep aita alamyz», - dedi Baqyt Nuruhanov.
