Memleket basshysynyń tóraǵalyǵymen sot júiesin jańǵyrtý máselelerine arnalǵan keńes ótti, dep habarlaidy "Ult aqparat" Aqordaǵa silteme jasap.
Jiynda sot júiesin Qazaqstan halqyna arnalǵan biylǵy Joldaýda kórsetilgen basymdyqtarǵa sáikes odan ári jańǵyrtý máseleleri talqylandy.
– Halyqtyń sottarǵa senimi memleketke degen senimmen bara-bar. Osyǵan bailanysty, «100 naqty qadam» Ult jospary aiasynda mańyzdy jumys atqaryldy. Sot júiesin jetildirý ekonomikamyzdy jańǵyrtýdyń jáne azamattardyń áleýmettik ál-aýqatyn arttyrýdyń mańyzdy bóligi sanalady, – dedi Elbasy.
Otyrysta Prezident Ákimshiliginiń Basshysy Á.Isekeshev, Joǵarǵy Sot tóraǵasy J.Asanov jáne Joǵary Sot Keńesiniń tóraǵasy T.Donaqov Memleket basshysynyń tapsyrmasymen qurylǵan Sot júiesin jańǵyrtý jónindegi jumys tobynyń atqarǵan jumysynyń qorytyndylary jóninde baiandama jasady.
Nursultan Nazarbaev sot júiesiniń jumysyndaǵy keshendi máselelerdi sheshý úshin tiisti sharalar qabyldaýdy tapsyrdy. Osyǵan orai, sot júktemesi sońǵy úsh jylda eki ese artqany atap ótildi.
– Bir jumys kúni ishinde sýdia 4 otyrys ótkizip, osynshama sheshim qabyldap, 150 sanktsiia shyǵarýy kerek. Osydan keiin, árine, olardyń sapasyna qatysty suraq týyndaidy. Bul isterdiń 30 paiyzy sotta qaraýdy qajet etpeidi, – dedi Memleket basshysy.
Qazaqstan Prezidenti elimizde sot júktemesin azaitý, azamattyq protsesti jeńildetý, sot isin júrgizýdiń jyldamdyǵyn arttyryp, ashyqtyǵyn qamtamasyz etý jóninde sharalar qabyldaýdy tapsyrdy.
– Sot kadrlarynyń sapasy, olardyń múldem basqa ádisterdi talap etetin zamanaýi ekonomikalyq jaǵdailarǵa ázirligi jáne beiimdelýi – mańyzdy máselelerdiń biri. Quqyqtyq saýaty joq sýdialar bizge reforma júrgizýge kómektese almaidy. Sýdialar quzyrettiliktiń, adaldyqtyń, ádilettilik pen ádeptiliktiń úlgisi bolýǵa tiis, – dedi Elbasy.
Nursultan Nazarbaev búginde sýdialardy irikteý tártibi kúsheitilgenin atap ótti. Máselen, sýdia laýazymyna 100 úmitkerdiń ishinen 5-eýi ǵana synaqtan ótken. Bul talaptar sot jumysyna kúrdeli isterdi qarastyrýǵa qabiletti ári biliktiligi joǵary zańgerlerdi tartý úshin qoiylyp otyr. Mundai mamandarǵa tiisti jaǵdai jasalyp, laiyqty jalaqy belgilenedi.
– Ant bergen sýdialarǵa aitarym, ant degenimiz – jai ǵana sóz emes. Óz is-áreketterińizde antty basshylyqqa alýlaryńyz kerek. Sýdialardyń jalaqysy men olardy qamtamasyz etý máselesi salyq tóleýshiler qarajaty esebinen sheshiledi. Sondyqtan, sýdialar tiimdi jumys isteýge tiis. Zań buzǵan sýdiaǵa eń qatal jaza qoldanylýy kerek, – dedi Memleket basshysy.
Qazaqstan Prezidenti kadrlyq máselelerdiń bárin Joǵary Sottan Joǵary Sot Keńesine berýdi uiǵardy. Sýdialardyń mansaptyq ilgerileýi qoǵam tarapynan baǵalanatyn kásibi biliktiligi men adaldyǵyna ǵana bailanysty bolýǵa tiis.
Elbasy sot kadrlaryn sapaly turǵyda jańartýǵa baǵyttalǵan zań jobasyn ázirlep, Parlamenttiń qaraýyna engizýdi tapsyrdy.
«Qazaqstan Respýblikasynyń sot júiesi jáne sýdialarynyń mártebesi týraly» Konstitýtsiialyq zańǵa sáikes, 2019 jyly 470 sýdia kásibi baǵalaýdan ótkiziledi. Osyǵan orai, Nursultan Nazarbaev Joǵarǵy Sot pen Joǵary Sot Keńesiniń basshylyǵyna bul máseleniń shynaiylyǵyn qamtamasyz etýdi tapsyrdy.
– Qoǵamda sottarǵa degen nyq senim bolǵanda ǵana sot júiesin jańǵyrta alamyz. Bizdiń túpki maqsatymyz – táýelsiz ári satylmaityn sot biligi. Sottar statistikalyq ádistermen ǵana emes, sondai-aq táýelsiz áleýmettik zertteýler júrgizý arqyly baǵalanatyn bolady. Sot quramy sýdialardyń qanshalyqty adal qyzmet etip, senimge ie bolǵanyna bailanysty baǵalanatynyn túsinýge tiis. Zańnamany qatań saqtaýǵa negizdelgen shuǵyl ári ashyq sot tóreligi qoǵamymyzdyń negizi múddesi men elimizdiń strategiialyq damý baǵytyna sai keledi, – dedi Memleket basshysy.
Qazaqstan Prezidenti sot isin júrgizýde jáne elektrondyq servister jumysynda jańa formattar engizýdi, sondai-aq sot ǵimarattarynda front-keńseler qurýdy tapsyrdy.
Belgilengen mindetterdiń júzege asyrylýyna baqylaý jasaýdy qamtamasyz etý Prezident Ákimshiligine júkteldi. Bul oraida, sot isteriniń sapaly ári ýaqtyly qaralýyna, sondai-aq azamattardyń talabyn qanaǵattandyrýǵa basa mán berilýi kerek.
