Jambyl oblysynda politseiler memlekettik grant rásimdep beremin degen jeleýmen jasalǵan alaiaqtyqtyń birneshe deregin tergep jatyr. Qaskóidiń áreketinen úsh turǵyn 3,1 million teńgeden astam shyǵynǵa ushyraǵan, dep habarlaidy ult.kz.
Polisia.kz málimetinshe, Taraz qalasynyń politsiiasyna úsh er adam aryzdanǵan. Olar jeke kásip ashýǵa nemese biznesti damytýǵa arnalǵan memlekettik qaitarymsyz grantty alyp beremin degen áieldiń qurbany bolǵan.
Tergeý barysynda anyqtalǵandai, 2026 jyldyń aqpan aiynda jábirlenýshiler áleýmettik jeliden iri memlekettik grant rásimdeýge kómektesý týraly jarnamany kórgen. Keiin kórsetilgen silteme arqyly ótip, kúdiktimen messendjerde bailanys ornatqan.
Ózin memlekettik baǵdarlamalar boiynsha maman retinde tanystyrǵan áiel buryn da kóptegen azamatqa qaitarymsyz grant alyp bergenin aityp sendirgen. Biraz ýaqyttan keiin ol árbir jábirlenýshige 13–13,6 million teńge kólemindegi grant maquldanǵanyn habarlaǵan.
Alaida grantty rásimdeý úshin jeke kásipker retinde tirkelý, qujattardy daiyndaý, konkýrsqa qatysý jáne túrli komissiialyq shyǵyndardy tóleý qajet ekenin aityp, azamattardan aqsha aýdarýdy suraǵan.
Nátijesinde jábirlenýshiler kórsetilgen bank shottaryna 1 285 000 teńge, 1 090 400 teńge jáne 803 000 teńge aýdarǵan.
Aqshany alǵannan keiin áiel granttyń jaqyn arada túsetinin aityp, ýaqyt sozǵan. Alaida ýáde etilgen qarajat berilmei, kóp uzamai kúdikti bailanysqa shyǵýdy toqtatqan. Osydan keiin jábirlenýshiler politsiiaǵa júgingen.
Atalǵan faktiler boiynsha qylmystyq ister tirkelip, sotqa deiingi tergep-tekserý júrgizilip jatyr.
Politsiia azamattardy áleýmettik jelilerdegi kúmándi jarnamalarǵa senbeýge, beitanys adamdardyń esepshotyna aqsha aýdarmaýǵa jáne memlekettik baǵdarlamalar týraly aqparatty tek resmi derekkózderden tekserýge shaqyrdy.
