Jýyrda Jambyl aýdanynyń Suranshy batyr aýylynda el-jurtty eleń etkizerlik is-shara ótkizildi. Naqtyraq aitatyn bolsaq, atalǵan eldi mekende 20 bas iri qarany birden kútimge alýǵa múmkindik beretin zamanaýi bordaqylaý alańy jumysyn bastady.
Jalpy, bul eldimeken - ataqty Sýyqtóbe taýynyń baýraiyna ornalasqan shuraily ólkelerdiń biri. Kezinde Amangeldi atyndaǵy qoi sovhozynyń ortalyǵy bolyp turǵanda osy jerden órbigen mal órisine syimai jatatyn. Irgeli sharýashylyqtyń qaramaǵynda 30-35 myńǵa tarta qoi, 500-ge jýyq iri qara, 300 bastai jylqy maly bolǵan edi. Aqtyly qoi ósirip, el rizyǵyn tasytqan eńbek adamdarynyń arasynan shynaiy qurmetke bólengen nebir ozattar shyqty. Solardyń ishinde eńbek ardagerleri, ordendi aǵa shopandar Ábdiǵul Eginshibaev, Qaiyrǵali Segizbaev, Boldyrǵan Qalibekova, Serikbai Sabyrov, Nurlybek Eginshievterdiń otardan-otar órgizgen eren eńbegin el-jurty áli umyta qoiǵan joq.
Sol ataqty malshylar urpaqtarynyń kópshiligi áli kúnge atakásipti serik etip, mal basyn jyldan-jylǵa kóbeitip, óristi malǵa toltyryp keledi. Ózderi jeke sharýashylyqtar quryp alǵan olar jańa zamannyń talabyna sai aqtyly mal ósirip, onyń rizyǵyn kórip otyr. Satybaldy Nurmanov, Qaidar Artyqbaev, Muqametqali Shóibekov, Jumaǵali Shormanov, Ǵalel Eginshibaev, Berik Beisembiev syndy azamattardyń tiianaqty tirligi búginde zamandastarynyń qai-qaisysyna da úlgi-ónege bolǵandai.
Bir kezdegi irgeli sharýashylyq ydyraýǵa shaq qalǵanda «Amangeldi» kooperativiniń tóraǵalyǵyna taǵaiyndalyp, aýys-túiisten qalǵan az ǵana mal men tehnikanyń basyn qurap, «Amangeldi» sharýa qojalyǵyn qurǵan bilikti basshy, tehnika tilin jetik biletin besaspap injener Satypaldy Nurmanov el rizyǵy bolyp tabylatyn jer qoryn shashaý shyǵarmai bir ózi igerip, jurttyń úlesin kúzgi jiyn-terinde jylma-jyl bólip berip otyr.
Búgingi sharaǵa solardyń bári birdei jinalyp kelip, aýyldan shyqqan bilikti azamattardyń taǵylymdy isine tilekterin aityp, qoldaý bildirip jatty. Jamaǵatqa jaǵymdy bul jańalyq - «Aibek» jáne «Órken», basshylary M. Izbasarov, M. Shóibekov, sharýa qojalyqtarynyń Talap aýyldyq okrýgi aýmaǵynan jańadan salǵan, 20 bas iri qarany birden kútimge alýǵa múmkindik beretin, zamanaýi talaptarǵa sai jabdyqtalǵan jańa bordaqylaý alańynyń tusaýkeser rásimi bolatyn.
Saltanatty sharany Talap aýyldyq ákimshiligi jastar isi jáne ishki saiasat bóliminiń basshysy Ainur Karbozova ashyp, alańnyń kógildir lentasyn eńbek ardagerleri, ataqty shopan Qaiyrǵali Segizbaev pen ardaqty ana Ultýǵan Shoibekova saltanatty túrde qidy. Qazaqi salt-dástúr boiynsha shashý shashyldy. Jinalǵan qaýym igilikti istiń bastamashylaryna biraýyzdan qutty bolsyn aityp, izgi tilekterin arnady.
Talǵat SÚIINBAI,
Qazaq jýrnalistikasynyń qairatkeri,
Jambyl aýdany
