Shymkenttik zańger, qoǵam belsendisi Aigúl Orynbek saryaǵashtyq 7 jasar bala men onyń týǵandaryn OQO-ǵa qaitarýdy surap otyr. Onyń pikirinshe, belgili bir taraptardyń arasyndaǵy teketiresten tek bala ǵana zardap shegedi. Bul týraly ol óziniń Facebook-paraqshasynda jazǵan.
«Ábden kúresip bittińizder me balany ermek qylyp? Boldy doǵaryńyzdar, raqmet! Aralaryńyzda qandai daý bolyp jatqanynda jumysym joq, biraq balany qorlaýǵa bolmaidy. Ońtústik jurtyn qaralaýdy doǵaryńyzdar! Zaǵipa hanym, balany árkimge kórsetip, siz zorlanǵan bala jaily kino túsirip júrsiz be? Nege bul isti ýshyqtyryp jiberdińizder? Balanyń psiholigiiasyna áser etip jatqandaryńyzben jumystaryńyz bar ma?» - deidi Aigúl Orynbek áńgimesiniń basynda.
Ol sondai-aq Bas prokýrordan ózin qylmystyq iske qoǵamdyq baqylaýshy retinde qatystyrýyn surady.
«Bas prokýror Q.Qojamjarov nazaryna! Jeti jasar balanyń isinde meni zańdy anasynyń zańdy ókili retinde tanyp, qylmystyq istiń ádiletti júrýine qoǵamdyq baqylaýshy retinde qatystyrýyńyzdy suraimyn! Byltyr jasóspirimderge qatysty jabylyp ketken eki isti qoǵammen kóterip, sotqa jetkizip, 12 jylǵa qamatqan bolatynbyz. Bala zorlanǵan dep aita bersek, erteń ol óz anasyn da kórgisi kelmei ketedi. Halyqtyń kúshin saiasattaǵy óz jeke bas paidalaryńyzǵa paidalanýdy qoiyńyzdar» - dep jazdy zańger áleýmettik jelidegi paraqshasynda.
Aita keteiik, Balalar quqyqtary jónindegi ýákil Zaǵipa Balieva zorlandy degen 7 jasar balany Astana ákelip, oǵan osynda saraptama jasatpaqshy. Iaǵni, zorlanǵany týraly aqparattyń ras-ótirigin tekseredi. Alaida, ondaǵan jyl boiy qaiyrymdylyqpen ainalysyp kele jatqan belsendi Arýjan Saiyn balany Almatyǵa aldyryp, táýelsiz ekspertiza jasatý kerek degendi aityp otyr.
Al, búgin Arnaiy prokýror OQO-da zorlandy delingen jeti jasar balaǵa qatysty isti óndiriske qabyldady.
