QR bala quqyqtary jónindegi ýákili Zaǵipa Bálieva zorlyq kórdi delingen oqýshy balamen kezdesti, - dep habarlaidy Tengrinews.kz.
Kezdesýden keiin ol tilshilerge bergen suhbatynda balanyń jaǵdaiyn aitty. Bálievanyń aitýynsha, balanyń densaýlyǵy men quqyǵyn qorǵaý maqsatynda tergeýshi balaǵa eshkimniń de qandai da bir suraq qoia almaityn qaýly shyǵarǵan.
"Tipti men balaǵa suraq qoia almaimyn. Meniń maqsatym - balanyń qaýipsizdikte ekenin anyqtaý edi. Onyń janynda týǵan-týysqandary bar, olar tergeýshiniń qaýlysyna sáikes, zorlyq taqyrybynda sóilemeýi tiis. Bala demalýy kerek, onyń janynda psiholog bar. Bala óte kóńildi. Demalýy úshin bir-eki kún kerek siiaqty", - dedi ol.
Depýtat balanyń anasymen tildeskenin aitty. "Bala qaýipsiz jerde ekenine kóz jetkizdim. Anasyn kóp ýaqyt boiy taba almadyq - anasymen sóilestim, ol da kelisti. Endi Astanada kezdesemiz, olar menimen birge Astanaǵa ushady. Balaǵa qolaily jaǵdai jasaý qajet, sebebi qosymsha saraptama jasaý balaǵa stress. Memlekettik organ ókilderi klinitsister men psihologtardy, psihiatrlar men balalar dárigerin berýge daiyn", - dep atap ótti Bálieva.
Sonymen qatar, Bálieva qazirgi memlekettik baǵdarlamalar boiynsha bala men onyń otbasy qorǵaýǵa alynyp, jumyspen, baspanamen jáne jańa mekteppen qamtamasyz etiledi.
"Otbasynyń barlyq múshesi, onyń ishinde sheshesi jumysqa ornalasa alady. Olarǵa baspana beriledi. Ol jańa mektepke barady, jańa dostary bolady. Oǵan qazir ǵana emes, bolashaǵyna da qaýipsiz jaǵdai jasaýymyz qajet. Sebebi balanyń bolashaǵy bar. Ájesimen sóilestik, olar kóshýge daiyn", - deidi ol.
Buǵan deiin Zaǵipa Bálieva zorlyq kórdi delingen balamen kezdesý úshin Shymkentke 14 naýryzda túngi ýaqytta ushyp kelgen bolatyn.
Eske salaiyq, Jelide OQO-nyń Saryaǵash aýdanyndaǵy Abai aýylynda jeti jasar bala zorlandy degen aqparat taraǵan. Keiin TVK málimetinshe, OQO IID ókilderi bul derekke qatysty QR Qylmystyq kodeksiniń 121-babynyń 4-bóligi ("Seksýaldyq sipattaǵy zorlyq-zombylyq áreketteri") boiynsha qylmystyq is qozǵalǵanyn habarlaǵan. Alaida kúdiktiler nemese ustalyp, qamalǵandar jaily eshqandai málimet túspedi. Artynsha bilim jáne ǵylym vitse-ministri Bibigúl Asylova saraptama qorytyndysy oqýshy balanyń zorlanǵanyn rastaǵanyn habarlaǵan.
