Áleýmettik jelilerde balalardy ózin-ózi qol jumsaýǵa shaqyratyn toptar paida bola bastady. Bul týraly bala quqyǵy jónindegi ýákil Zaǵipa Balieva eskertti, dep habarlaidy Sputnik Qazaqstan.
Ombýdsmen ata-analardy barynsha muqiiat bolyp, qaýipti toptar týraly quqyq qorǵaý organdaryna habar berýge shaqyrdy.
"Internetke basa nazar aýdarýdy ótinemin. Maǵan "VKontakte" jelisinde balalardy sýitsidke shaqyratyn toptar paida bola bastaǵany týraly úreili habarlamalar kelip jatyr. Quqyq qorǵaý organdary qazir bul máselemen ainalysýda, men de baqylap otyrmyn. Alaida mundai toptardy anyqtaý men buǵattaý biraz ýaqyt alýy múmkin. Sondyqtan men sizderden kómek suraimyn: eger osyndai top týraly estip-bilseńiz, birden quzyrly organdarǵa habar berińiz", —dep jazdy Balieva feisbýktegi paraqshasynda.
Ol birneshe jasóspirimniń ómirin qiǵan "Kók kit" tobyn eske saldy.
"Balalarǵa osyndai qaýipti toptar baryn aityp túsindirińizder. Eger olardy internette áldekim qorqytatyn bolsa, eń aldymen, sizderge habar berýi kerek. TMD elderinde birneshe balanyń ómirin qiǵan "Kók kit" tobyn mysalǵa keltirińizder. Top uiymdastyrýshylary bul balalardy eger olar ózine qol jumsamasa, otbasyn óltiremiz dep qorqytqan. Top uiymdastyrýshysy qolǵa tústi, ol jasópirim bolyp shyqqan. Ol úshin bul jai ǵana oiyn bolǵan", — dedi bala quqyǵy jónindegi ýákil.
Balalar ombýdsmeni qazir bailanys operatorlary "ata-ana baqylaýy" qyzmetin usynyp otyrǵanyn atap ótti.
"Ony paidalaný múmkindigin qarastyryńyzdar", — dep keńes berdi ol ata-analarǵa.
