Qazaq arasynda orystyq sanamen ýlanǵandardyń shymkenttikterge úrke qarap, mysqyldap, ájýalap sóileitinderi kezdesedi. Olardy "iýjandar", "tehastyqtar" dep mysqyldaidy. Menińshe, bul shymkentikterdiń ulttyq salt-dástúrge beriktigin, ómirge beiimdiligin, iskerlikterin, kásipkerlik talanttaryn qabyldai almaǵan jandardyń qyzǵanyshynan týyndaǵan keshegi keńestik, orystyq kózqarastan týyndaǵan "qasań" kórinis.
Shymkenttikterden kóp úlgi alýǵa bolady. Demografiia jaǵynan Shymkent oblysy búkil Qazaqstanǵa "donor", oblys ortalyǵy Shymkent qalasy eshbir qoldaýsyz, bai shikizattyq ken oryndarynsyz-aq "milliondyq" shaharǵa ainaldy, Qazaq eline belgili mádeniet maitalmandary, aqyn-jazýshylar, isker jandardyń qatary da mol. Jaqynda "Serpin" jobasynyń negizinde 1 apta kóleminde Shymkentte bolyp, shyraily aimaqtyń tynys-tirshiligin óz kózimmen kórdim, kórdim de - kóńilim toldy. Aldymen adamǵa qyzmet kórsetý salasy erekshe damyǵan: eki qadam saiyn dámhana, kafe, shaihana. Baǵalary tómen, taǵamy dámdi. Qoǵamdyq kólikter zyryldap tur.Taksi arzan. Qala taza, kórikti. Turǵyndary kishipeiil, iltipatty.
Qazaqilyq mádeniet aiqyn baiqalady. Shymkenttiń kórikti jerlerine qazaqtyń Abai, Baýyrjan Momyshuly syndy tulǵalaryna eńseli eskertkishter ornatylǵan.
Meni asa tańqaldyrǵan nárse qonaq úi boldy. "Shymkent" qonaq úii "tórt juldyzdy" sapaǵa ie eken. Juldyzyna qyzmeti de sai. Ońtústik Koreianyń astanasy Seýlde dál osyndai tórt juldyzdy qonaq úide jatqanbyz. Bul odan bir mysqal da kem emes. Barlyq jaǵdai jasalǵan: wi-wi, muzdatqysh, televizor, jeldetkish (otandyq - Alma com), mini-bar, shved stoly úlgisindegi tańǵy as. Aiyrmashylyq (ázil retinde-avtor): Seýlde ýnitazdyń dáret alǵan kisige jasaityn qyzmeti tolyq avtomattandyrylǵan, iaǵni shaiý, jýyný, qurǵatý degen máseleler qol jetetin jerdegi arnaiy qondyrǵy arqyly basqarylady. Ishimnen: "avtomattandyrylǵan ýnitazǵa da qolymyz jeter, óitkeni dáret alýǵa erekshe mán beretin musylman jurtymyz ǵoi, Eýropanyń tehnologiiasyn baiyǵan kezde alarmyz, - dep oi túidim.
Onyń esesine Shymkent qonaq úiiniń baǵasy - qaltańa salmaq salmaidy. Bir kisilik liýks bólme - 9000 (toǵyz myń) teńge. Óz Otanymyzda osyndai qyzmet kórgenge ne jetsin! Kóńiliń tolady. Mundai tórt juldyzdy qonaq úige degen arzan baǵany eshbir Eýropa eli usyna almas. Bálkim, bul salystyrýym da durys emes shyǵar. Sebebi Eýropanyń ómir súrý deńgeii bizden góri áldeqaida joǵary ǵoi. Joǵary eldiń qyzmet baǵasy da soǵan laiyq. Biraq shymkenttikterdiń eldiń turmys jaǵdaiyn, al-aýqatyn túsinip, arzan baǵa qoiyp otyrǵany da iskerliktiń bir kórinisi ma dep oiladym. Paidany taýar men qyzmettiń kólemi arqyly alýǵa bolatyny sózsiz. Bizder baǵany qymbat qoiyp, tez paida tabýǵa tyrysatyn siiaqtymyz. Elińe paida ákelmegen iskerliktiń nesi saýap?! Shymkentten osyndai taǵylym alýǵa bolady. Shyraily Shymkent degen tirkes bekerden-beker túzilmese kerek!
Almasbek Ábsadyq,
Ult portaly
.jpg)