قازاق اراسىندا ورىستىق سانامەن ۋلانعانداردىڭ شىمكەنتتٸكتەرگە ٷركە قاراپ, مىسقىلداپ, ەجۋالاپ سٶيلەيتٸندەرٸ كەزدەسەدٸ. ولاردى "يۋجاندار", "تەحاستىقتار" دەپ مىسقىلدايدى. مەنٸڭشە, بۇل شىمكەنتٸكتەردٸڭ ۇلتتىق سالت-دەستٷرگە بەرٸكتٸگٸن, ٶمٸرگە بەيٸمدٸلٸگٸن, ٸسكەرلٸكتەرٸن, كەسٸپكەرلٸك تالانتتارىن قابىلداي الماعان جانداردىڭ قىزعانىشىنان تۋىنداعان كەشەگٸ كەڭەستٸك, ورىستىق كٶزقاراستان تۋىنداعان "قاساڭ" كٶرٸنٸس.
شىمكەنتتٸكتەردەن كٶپ ٷلگٸ الۋعا بولادى. دەموگرافييا جاعىنان شىمكەنت وبلىسى بٷكٸل قازاقستانعا "دونور", وبلىس ورتالىعى شىمكەنت قالاسى ەشبٸر قولداۋسىز, باي شيكٸزاتتىق كەن ورىندارىنسىز-اق "ميلليوندىق" شاھارعا اينالدى, قازاق ەلٸنە بەلگٸلٸ مەدەنيەت مايتالماندارى, اقىن-جازۋشىلار, ٸسكەر جانداردىڭ قاتارى دا مول. جاقىندا "سەرپٸن" جوباسىنىڭ نەگٸزٸندە 1 اپتا كٶلەمٸندە شىمكەنتتە بولىپ, شىرايلى ايماقتىڭ تىنىس-تٸرشٸلٸگٸن ٶز كٶزٸممەن كٶردٸم, كٶردٸم دە - كٶڭٸلٸم تولدى. الدىمەن ادامعا قىزمەت كٶرسەتۋ سالاسى ەرەكشە دامىعان: ەكٸ قادام سايىن دەمحانا, كافە, شايحانا. باعالارى تٶمەن, تاعامى دەمدٸ. قوعامدىق كٶلٸكتەر زىرىلداپ تۇر.تاكسي ارزان. قالا تازا, كٶرٸكتٸ. تۇرعىندارى كٸشٸپەيٸل, ٸلتيپاتتى.
قازاقيلىق مەدەنيەت ايقىن بايقالادى. شىمكەنتتٸڭ كٶرٸكتٸ جەرلەرٸنە قازاقتىڭ اباي, باۋىرجان مومىشۇلى سىندى تۇلعالارىنا ەڭسەلٸ ەسكەرتكٸشتەر ورناتىلعان.
مەنٸ اسا تاڭقالدىرعان نەرسە قوناق ٷي بولدى. "شىمكەنت" قوناق ٷيٸ "تٶرت جۇلدىزدى" ساپاعا يە ەكەن. جۇلدىزىنا قىزمەتٸ دە ساي. وڭتٷستٸك كورەيانىڭ استاناسى سەۋلدە دەل وسىنداي تٶرت جۇلدىزدى قوناق ٷيدە جاتقانبىز. بۇل ودان بٸر مىسقال دا كەم ەمەس. بارلىق جاعداي جاسالعان: wi-wi, مۇزداتقىش, تەلەۆيزور, جەلدەتكٸش (وتاندىق - Alma com), ميني-بار, شۆەد ستولى ٷلگٸسٸندەگٸ تاڭعى اس. ايىرماشىلىق (ەزٸل رەتٸندە-اۆتور): سەۋلدە ۋنيتازدىڭ دەرەت العان كٸسٸگە جاسايتىن قىزمەتٸ تولىق اۆتوماتتاندىرىلعان, ياعني شايۋ, جۋىنۋ, قۇرعاتۋ دەگەن مەسەلەلەر قول جەتەتٸن جەردەگٸ ارنايى قوندىرعى ارقىلى باسقارىلادى. ٸشٸمنەن: "اۆتوماتتاندىرىلعان ۋنيتازعا دا قولىمىز جەتەر, ٶيتكەنٸ دەرەت الۋعا ەرەكشە مەن بەرەتٸن مۇسىلمان جۇرتىمىز عوي, ەۋروپانىڭ تەحنولوگيياسىن بايىعان كەزدە الارمىز, - دەپ وي تٷيدٸم.
ونىڭ ەسەسٸنە شىمكەنت قوناق ٷيٸنٸڭ باعاسى - قالتاڭا سالماق سالمايدى. بٸر كٸسٸلٸك ليۋكس بٶلمە - 9000 (توعىز مىڭ) تەڭگە. ٶز وتانىمىزدا وسىنداي قىزمەت كٶرگەنگە نە جەتسٸن! كٶڭٸلٸڭ تولادى. مۇنداي تٶرت جۇلدىزدى قوناق ٷيگە دەگەن ارزان باعانى ەشبٸر ەۋروپا ەلٸ ۇسىنا الماس. بەلكٸم, بۇل سالىستىرۋىم دا دۇرىس ەمەس شىعار. سەبەبٸ ەۋروپانىڭ ٶمٸر سٷرۋ دەڭگەيٸ بٸزدەن گٶرٸ ەلدەقايدا جوعارى عوي. جوعارى ەلدٸڭ قىزمەت باعاسى دا سوعان لايىق. بٸراق شىمكەنتتٸكتەردٸڭ ەلدٸڭ تۇرمىس جاعدايىن, ال-اۋقاتىن تٷسٸنٸپ, ارزان باعا قويىپ وتىرعانى دا ٸسكەرلٸكتٸڭ بٸر كٶرٸنٸسٸ ما دەپ ويلادىم. پايدانى تاۋار مەن قىزمەتتٸڭ كٶلەمٸ ارقىلى الۋعا بولاتىنى سٶزسٸز. بٸزدەر باعانى قىمبات قويىپ, تەز پايدا تابۋعا تىرىساتىن سيياقتىمىز. ەلٸڭە پايدا ەكەلمەگەن ٸسكەرلٸكتٸڭ نەسٸ ساۋاپ?! شىمكەنتتەن وسىنداي تاعىلىم الۋعا بولادى. شىرايلى شىمكەنت دەگەن تٸركەس بەكەردەن-بەكەر تٷزٸلمەسە كەرەك!
الماسبەك ەبسادىق,
ۇلت پورتالى
.jpg)