QR Bas prokýratýrasy áleýmettik jelide «Qazaqstannyń demokratiialyq tańdaýy» ekstremistik uiymynyń arandatý habarlamalary men beinerolikteriniń taraǵanyn anyqtady. Onda atalǵan uiymnyń basshysy Muhtar Ábiliazov pen onyń sybailastary Qazaqstan azamattaryn 2018 jylǵy 23 maýsymda mitingterge shyǵýǵa shaqyrady.
Bul týraly vedomstvonyń baspasóz qyzmetinen habarlady.
«DVK-nyń» ideialary men mitingterdi úgitteý úshin Ábiliazovqa shetelde qazaqstandyq sot tóreliginen jasyrynyp júrgen Janar Ahmetova, Bota Djardemali jáne basqa adamdar kómektesýde», - delingen habarlamada.
Bas prokýratýranyń habarlaýynsha, olardyń is júzindegi maqsaty - qylmystyq qýdalaýdy saiasilandyryp, Qazaqstanda aýyr jáne asa aýyr qylmystardy jasaǵany úshin jaýaptylyqtan jaltarý.
«Jariialanǵan beinerolikterdi túsirý úshin Ábiliazovtyń aqshasyna Kiev qalasynda jarnamalyq agenttik jáne azialyq kelbeti bar kásibi akterlar men modelder jalǵa alynǵan. Negizinde olar Qazaqstan Respýblikasynyń azamattary emes.
Beinerolikterdiń mazmuny shyndyqqa janaspaidy jáne qazaqstandyq qoǵamda áleýmettik alaýyzdyq pen arazdyqty týdyrýǵa baǵyttalǵan.
Ústimizdegi jyldyń 12 maýsymynda «Iýtýb» kanalynda «Muǵalimder Ábiliazovtyń mitingisine shyǵady» degen beinerolikte «qazaqstandyq jas muǵalim» rólin Kiev qalasynda tańdalǵan aktrisa oinaǵan.
«Iýtýbtyń» basqa beinematerialynda, Qazaqstanda jumys isteidi degen jáne halyqty 23 maýsymda mitingke shyǵýǵa shakyrǵan jas jigit - Ábiliazovtyń týǵan jieni Aidar Amangeldiev. Ol Qazaqstannan 2009 jyly kóship ketken.
Qazirgi ýaqytta ol Shotlandiianyń qymbat ýniversitetteriniń biri - «Glazgoý Kaledonianyń» stýdenti. Bul ýniversitette jyl saiynǵy oqyp turý tólemaqysy 20 myń sterling fýntty nemese 9 mln teńgeni quraidy.
Sotpen 2018 jylǵy 13 naýryzdan bastap Qazaqstan Respýblikasynyń barlyq aýmaqtarynda «DVK-nyń» is-áreketine tyiym salynǵanyn esterińizge salamyz.
Bas prokýratýra «DVK-nyń» ekstremistik áreketine kez-kelgen qatysý jáne ony qarjylandyrý úshin Qazaqstan Respýblikasy Qylmystyq kodeksiniń 258 jáne 405-baptaryna sáikes qylmystyq jaýaptylyqqa tartylatynyn qaitalap túsindiredi.
Mitingterge qatysýǵa shaqyrý úgetteýleri «Beibit jinalystar, mitingiler, sherýler, piketter jáne demonstratsiialar uiymdastyrý men ótkizý tártibi týraly» Zańnyń erejelerin buzady.
Ashyq aktsiialardy ótkizý úshin 10 kún buryn tiisti aryz bere otyryp, jergilikti atqarýshy organnyń ruqsatyn alý qajet.
Búgingi tańda ákimdikterge ústimizdegi jyldyń 23 maýsymynda miting ótkizý týraly aryzdar túspegen.
Osyǵan bailanysty, mitingter zańsyz bolyp tabylady, olardy uiymdastyrý men oǵan qatysqany úshin Qazaqstan Respýblikasy Ákimshilik quqyq buzýshylyqtar týraly kodeksiniń 488-babyna sáikes jaýaptylyq, onyń ishinde 15 táýlikke qamaýǵa alý kózdelgen.
«Prokýratýra týraly» Zańmen kózdelgen ókilettikterdi paidalanyp, barlyq azamattardy zańdylyqty jáne qoldanystaǵy qazaqstandyq zańnamanyń talaptaryn qatań saqtaýǵa, arandatýshylyqqa jáne quqyq buzýshylyqqa jol bermeýge shaqyramyz», - delingen habarlamada.
