Koronavirýs pandemiiasy saldarynan bar álem oqshaýlanýǵa májbúr boldy. Bul ekonomika, bilim berý, densaýlyq saqtaý syndy birqatar salanyń jumysyna yqpal etti. Osy oraida QR Ulttyq kardiohirýrgiialyq ortalyǵynyń basqarma tóraǵasy Iýrii Pia karantinde donorlyq jumystyń qandai máselelerge tap bolǵanyn aityp berdi, dep habarlaidy QazAqparat.
Onyń aitýynsha, Qazaqstan - pandemiiaǵa qaramastan transplantatsiia júrgizip jatqan Ortalyq Aziiadaǵy jalǵyz memleket.
«Karantin kezinde bizde ǵana emes, barlyq álemde transplantatsiia kólemi azaidy. Kei elderde donorlyq jumysy múldem toqtatylǵan. Eýropa elderi ortaq jeli quryp, yqtimal donorlar týraly derekter bankin qurdy. Osylaisha, organ muqtajdyǵyn joiyp, tiimdi jumys istep jatyr. Al biz - Ortalyq Aziiada júrek pen ókpe almastyratyn jalǵyz elmiz. Mundai otany tek Qazaqstan ishinde ǵana jasai alamyz. Organdardy ózge elden jetkize almaimyz jáne ózimiz de jibere almaimyz. Sondyqtan bizde qaitys bolǵan adamnan organ alý jumystary óte az júrgiziledi», - dedi Iýrii Pia kardiohirýrgiialyq ortalyqta ótken baspasóz máslihatynda.
Dáriger 2012 jyldan beri Qazaqstanda júrek almastyrýda 81 ota jasalǵanyn aitty.
«Bul - óte az kórsetkish. Kún saiyn adamdar jol apatynan, óndiriste nemese miǵa qan quiylyp qaitys bolady. Osylaisha, yqtimal donorlar sany kóp bolady. Alaida, olardyń jaqyndary men týystary kóp jaǵdaida transplantatsiiaǵa ruqsat bermeidi. (...) Halyqaralyq statistikada 1 mln adamda 10 júrek almastyrylady. Bizdiń elimizde jylyna shamamen 180 júrek aýystyrý suranysy bar. Al biz mundai otalardy jylyna 10 ret qana jasaimyz. Tiri donordan kóp jaǵdaida naýqastyń týystarynan búirek nemese baýyrdyń bir bóligi alynady. Al júrek pen ókpe tek qaitys bolǵandardan alynady», - dedi Iýrii Pia.
