Ál-Farabi men Shymkenttiń mereitoilaryn atalyp ótedi, dep habarlaidy "Ult aqparat" QR Syrtqy ister ministrligi taratqan aqparatqa silteme jasai otyryp.
«2019 jylǵy 12-27 qarasha aralyǵynda Frantsiia astanasynda ótken IýNESKO-nyń 40-shy Bas konferentsiiasy ortaǵasyrlyq Shyǵystyń ǵulama oishyly ári ǵalymy Ábý Nasyr Ál-Farabidiń 1150-jyldyǵyn jáne Shymkent qalasynyń negizi qalanýynyń 2200-jyldyǵyn kelesi jyly atap ótetin halyqaralyq mereitoilar tizimine engizý jóninde arnaiy qarar qabyldady», - delingen habarlamada.
Uiymǵa múshe 193 memlekettiń ortaq sheshimine sáikes IýNESKO Hatshylyǵyna atalǵan mereitoilar aiasynda ótkiziletin is-sharalarǵa qatysý tapsyryldy.
Bas konferentsiianyń plenarlyq jinalysynda Qazaqstannyń Frantsiiadaǵy Elshisi ári IýNESKO janyndaǵy Turaqty ókili Jan Ǵaliev múshe memleketterge elimizdiń usynystaryn qoldaǵandary úshin alǵys bildirip, olardy atalǵan mereitoilarǵa, jáne qazaqtyń uly aqyny ári oishyly Abai Qunanbaiulynyń 175-jyldyǵyna orai elimizde jáne shetelde ótkizilýi josparlanyp otyrǵan is-sharalarǵa qatysýǵa shaqyrdy.
IýNESKO mereitoilary kúntizbesine engizý jóninde ótinishter, atap ótilýi Uiymnyń jahandyq mádeniet, ǵylym men bilimge qosqan úlesterin nasihattaý arqyly halyqtardy jaqyndastyrý maqsatyna sai keletin, mańyzdy oqiǵalar, aitýly tulǵalardyń týǵanynyń nemese qaitys bolǵanynyń elýge bólinetin datalarǵa qatysty bolýy tiis.
40-shy Bas konferentsiia bekitken tizimge 53 múshe memlekettiń usynysy endi, solardyń arasynda – kóne túrki jazýynyń asa mańyzdy úlgilerin qamtityn Bilge qaǵan men Tońyquq (Tońykók) eskertkishteri ornatylýynyń 1300-jyldyǵyna arnalǵan is-sharalarǵa IýNESKO-nyń qatysýy jóninde túrkitildes elder men Mońǵoliianyń birlesken usynysy da bar.
Bas konferentsiianyń jalpy saiasi debattarynda sóilegen óz sózinde, Elshi J. Ǵaliev alqaly jiyndy elimizde bilim, ǵylym jáne mádeniet salalarynyń keshendi damýyn qamtamasyz etý boiynsha memlekettik saiasat jáne Memleket basshysynyń «Syndarly qoǵamdyq dialog – Qazaqstannyń turaqtylyǵy men órkendeýiniń negizi» Joldaýyndaǵy tiisti qaǵidalar jóninde habardar etti.
Otandyq diplomat atap ótkendei, Jibek joly qalyptasyp, Altyn Orda órkendegen zamandardan beri elimiz órkenietter men mádenietter únqatysýynyń jahandyq dárejede mańyzǵa ie ortalyqtarynyń birine ainaldy. Osy oraida, Qazaqstan Birikken Ulttar Uiymy aiasynda Mádenietter jaqyndasýynyń halyqaralyq onjyldyǵyn (2013-2022 jj.) ótkizýdi usynǵany zańdy qubylys.
Elbasynyń bastamasymen Almatyda IýNESKO qamqorshylyǵymen Mádenietter jaqyndasýynyń halyqaralyq ortalyǵy quryldy, jáne 2019 jyly maýsym aiynda Uiym Hatshylyǵy men Qazaqstan Úkimeti onyń qyzmetiniń erejeleri týraly kelisimge qol qoidy.
Elshiniń aitýynsha, Qazaqstan bilim, ǵylym, mádeniet, telekommýnikatsiialardyń damýy, genderlik teńdik salalaryndaǵy halyqaralyq yntymaqtastyqqa belsendi qatysyp turady. Osy oraida ol IýNESKO Bas konferentsiiasyn sońǵy on jylda Qazaqstannyń joǵary jáne kásiptik bilim oryndarynda Aýǵanstannyń shamamen 1000 daryndy jastaryna, sonyń ishinde júzdegen qyzdar men kelinshekterge, beibit ómirde qajetti mamandyqtar boiynsha tegin bilim berilgeni jóninde habardar etti.
Bas konferentsiia aiasynda Qazaqstan Jibek joly boiynda ornalasqan elderdiń mádeni-gýmanitarlyq yntymaqtastyǵyn yntalandyrý jónindegi IýNESKO jobasyna jáne osy ǵylymnyń damýyna Ál-Farabi aitýly úles qosqanyn eskere otyra 14 qańtardy Álemdik Logika kúni retinde belgileý jóninde qararlardy qoldady.
Sonymen birge, alqaly jiyn sheńberinde 120-dan astam múshe memleket ókilderiniń, sonyń ishinde Qazaqstannyń Mádeniet jáne sport ministri Aqtoty Raiymqulovanyń, qatysýymen mádeniet ministrleriniń dúniejúzilik forýmy ótti.
Bas konferentsiia aiasynda, sondai-aq, Joǵary bilimde biliktilikterdi moiyndaý jónindegi Jahandyq konventsiia qabylandy. Álemniń derbes óńirleri arasynda akademiialyq mobildilik úshin halyqaralyq-quqyqtyq negizderdi nyǵaitatyn qujattyń ázirlenýine Qazaqstannyń Bilim jáne ǵylym ministrliginiń mamandary da ózderiniń mazmundy úlesin qosty.
