Túrkiia qazaqtary qurǵan uiymdardyń biri – Qazaqkent Altai qaýymdastyǵynyń uiytqy bolýymen qazaq diasporasy Ystanbulda Táýelsizdiktiń 30 jyldyǵyna arnalǵan merekelik is-shara ótkizdi, dep habarlaidy QazAqparat.
Qandastarymyzdyń kúshimen jáne Qazaqstannyń Ystanbuldaǵy Bas konsýldyǵynyń qoldaýymen ótkizilgen is-shara merekelik kontsertpen bastalyp, qonaqtarǵa ulttyq taǵamdardyń usynylýymen jalǵasty. Sondai-aq, shara aiasynda Ystanbuldaǵy jas qandastar fýtboldan jarys ótkizdi.
Ystanbul qazaqtarynyń basqosýynda Bas konsýl Álim Baiel diasporanyń belsendi ókilderine alǵys hattar men estelik syilyqtar tabystady. Jyraqta júrse de, atajurttyń azattyǵy men órkendeýine qashan da tilektes bolyp júrgen alystaǵy aǵaiyn Qazaq eliniń ózderine kórsetken qamqorlyǵy úshin alǵys bildirdi.
Sonymen qatar, aitýly merekeni qandastarmen toilaý aiasynda Bas konsýl Á. Baiel qazaq diasporasy qurǵan taǵy bir uiym – Qoja Ahmet Iasaýi ǵylym jáne parasat qorynda diaspora ókilderimen kezdesip, Táýelsizdik jáne qazaq-túrik yntymaqtastyǵy jóninde áńgime qurdy.
Jalpy, Táýelsizdiktiń 30 jyldyǵyna orai, alyp shaharda jyl basynan beri birtalai shara ótti. Atap aitqanda, Abai alańy men eskertkishi ashylyp, Dúniejúzi qazaqtary qaýymdastyǵynyń kishi quryltaiy ótti. Sonymen qatar, Qazaqstan táýelsizdiginiń 30 jyldyǵyna arnalǵan kúmis estelik moneta basyldy. Budan bólek, Mustafa Óztúrik atyndaǵy saiabaq ashyldy. Qazaqtyń óneri men mádenietin, elimizdiń áleýetin tanystyrý maqsatynda Táttimbet atyndaǵy orkestrdiń kontserti, «Ulytaý» tobynyń kontserti, «Alataý» teatrynyń «Altybaqan» oiyn-saýyq keshi, «Tomiris» jáne «Qazaq handyǵy» filmderiniń kórsetilimi, «Ordaly eldiń 30 jyly» jetistikter kórmesi, «Táýelsizdiktiń 30 jyly jáne investitsiialyq múmkindikter» dóńgelek ústeli uiymdastyryldy. Sondai-aq, qazaqstandyq stýdentterdiń slioty ótip, Ystanbulda bilim alyp jatqan jastardyń «Birlik» uiymy quryldy.
