BAQ-ta Ystambulda bomba jardy degen kúdikpen ustalǵan áieldiń videosy jariialandy, - dep habarlaidy Tengrinews.kz agenttigi Milliyet túrik basylymyna silteme jasap.
Terrorizmge qarsy bólim brigadalary shabýylǵa kináli dep tanylǵan áieldi ustady. Jelide kúdikti ustalǵan sáttiń kadrlary paida boldy.
Aita ketetin jait, buǵan deiin túrik politsiiasy 22 kúdiktini ustaǵan bolatyn, onyń ishinde bomba qoiǵan áiel de bar. Bul týraly Túrkiianyń ishki ister ministri Súleiman Soilý málimdedi.
"Biz shabýyl týraly nusqaý Kobaniden kelgen dep baǵaladyq. Oqiǵaǵa sebepker adam bombany qoiyp ketken, ol ustaldy. Buǵan deiin taǵy 21 adam ustaldy", - dedi ishki ister ministri.
Sonymen qatar, Soilý Ystambuldaǵy jarylysty uiymdastyrýshylar men kinálilerge qatań jaýap beriletinin aitty.
"Qylmysker Afrin arqyly ótken. Qazir munyń bári anyqtalyp jatyr. Túrkiiaǵa ziianyn tigizgen bul shabýyldy uiymdastyrýshylarǵa da, jasaǵandarǵa da qatań jaýap beriledi", - dedi ministr.
Jarylys Ystambuldyń ortalyǵynda, Beioglý aýdanyndaǵy Taksim alańy mańyndaǵy adam kóp júretin Istiklial kóshesinde bolǵan. Bul - týrister arasynda tanymal baǵattardyń biri. Túrik aqparat quraldarynyń málimetinshe, jarylys alty adamnyń ómirin qiyp, 81 adam jaraqat alǵan.
Aita keteiik, jarylysqa jaýapkershilikti ázirge eshkim moinyna alǵan joq. 2015-2016 jyldary Túrkiianyń iri qalasynda "Islam memleketi" terror uiymy birneshe ret jarylys jasaǵan.
