Foto: Lovepik
Qazaqstannyń ońtústiginde sý resýrstary tapshylyǵy ýshyǵyp bara jatqan shaqta, Sý resýrstary jáne irrigatsiia ministrligi «Qazsýshar» mekemesiniń Qyzylorda jáne Túrkistan oblystaryndaǵy filialdaryna qatysty qatań shara qabyldady. Ministrlik baqylaýdyń álsizdigi men zańsyz áreketterge jol bergeni úshin birneshe filial direktorlaryna jáne bólimshe basshylaryna qatań sógis jariialady, dep habarlaidy Ult.kz.
Tekseris nátijeleri kúrish egistigi úshin sýdy ruqsatsyz paidalanǵan faktilerdi anyqtaǵan. Túrkistan oblysynda kúrish alqabynyń kólemi josparlanǵan 2800 gektardyń ornyna 13 258 gektarǵa jetken. Bul — jospardan 4,7 ese artyq kórsetkish.
«Qazsýshardyń» Jetisai, Maqtaaral jáne Shardara óndiristik bólimsheleri sharýalarmen kúrish egistigin sýarý týraly júzdegen kelisimshart jasaǵan. Atap aitqanda:
-
Jetisai – 1 528 gektarǵa 77 kelisimshart
-
Shardara – 6 453 gektarǵa 499 kelisimshart
-
Maqtaaral – 5 277 gektarǵa 471 kelisimshart
Al Qyzylorda oblysynda 126 sharýa qojalyǵy eshqandai kelisimshartsyz 4 908 gektar kúrish alqabyn sýarǵany anyqtaldy. Bul rette 52 mln tekshe metrge jýyq sý zańsyz paidalanylyp, qosymsha 180 mln tekshe metrge qajettilik týyndaǵan. Jalpy sý alý kólemi ruqsat etilgen shekten 220 mln tekshe metrge artyp ketýi múmkin.
Bul jaǵdai sýdy adal kelisimshartpen paidalanyp otyrǵan tutynýshylardyń jaǵdaiyn qiyndatyp, sý resýrstaryna qosymsha salmaq túsirip otyr.
Sý tapshylyǵy jaǵdaiynda baqylaýsyz egis — kúrdeli qaýip
Ministrlik bul zańbuzýshylyqtardy sýarmaly sýdyń tapshylyǵy jaǵdaiynda asa qaýipti dep baǵalady. Biyl sýarý maýsymy aýa temperatýrasynyń joǵary bolýy men jaýyn-shashynnyń bolmaýyna bailanysty 20 kúnge erte bastaldy. Osyǵan orai egistikterdi kezekpen sýarý tártibi engizilgen.
Búginde elimizdiń ońtústiginde aýyl sharýashylyǵy úshin alynǵan sý kólemi shamamen 7 mlrd tekshe metrdi quraidy. Onyń ishinde:
-
Túrkistan oblysy – 2,82 mlrd m³
-
Qyzylorda oblysy – 2,5 mlrd m³
-
Jetisý oblysy – 631,7 mln m³
-
Almaty oblysy – 527 mln m³
-
Jambyl oblysy – 512 mln m³
Qatań shara – júieli ózgeriske negiz bolýy tiis
Sý resýrstary jáne irrigatsiia ministrligi ylǵaldy kóp qajet etetin daqyldardy shekteý, sýdy ádil jáne tiimdi bólý, sondai-aq salada ashyqtyq pen tártip ornatý baǵytynda júieli jumys júrgizetinin málimdedi. Zańsyzdyqtarǵa jol bergen basshylarǵa qatysty sharalar osy baǵyttaǵy alǵashqy qadamdardyń biri sanalady.
