Facebook-tiń negizin qalaǵan Mark Tsýkerberg kompaniiany "soǵys jaǵdaiynda" basqarýǵa májbúr bolyp otyrǵanyn málimdedi. Bul týraly Tsýkerbergke jaqyn derekkózderge silteme jasaǵan Wall Street Journal (WSJ) habarlady.
Tsýkerbergtiń sózinshe, kompaniia AQSh Kongresi, investorlar men qoldanýshylardyń qysymyna ushyrap otyr. Tsýkerberg osyǵan bailanysty top-menedjerler áleýmettik jeliniń qaýipsizdigi jáne akkaýnttar sanynyń baiaý artýy siiaqty máselelerge jedel jaýap qatýy tiis dep sanaidy.
Basylym dereginshe, Tsýkerberg jumys isteý tásilderin ózgertkendikten keibir negizgi menedjerler qyzmetten ketýge májbúr bolǵan. Olar Tsýkerbergtiń sýretter jariialaityn qosymshalarǵa qoldanýshylardyń geolokatsiialyq málimetterin Facebook-ke joldaýǵa múmkindik berý jónindegi ustanymymen kelispegen.
Wall Street Journal sonymen qatar Tsýkerberg pen bas atqarýshy direktor Sheril Sendbergtiń qatynasy shielenise bastaǵanyn da habarlady. Tsýkerberg ony jáne oǵan baǵynyshty qurylymdy Cambrdige Analytica kompaniiasynan týyndaǵan daýǵa bailanysty aiyptaǵan.
Ótken aptada New York Times gazeti Facebook byltyr PR agenttigine ózin synaityndardyń bedelin túsirýge tapsyrys bergenin habarlaǵan. Wall Street Journal-dyń málimetinshe, mundai qyzmetke kompaniianyń qoǵammen bailanys departamentiniń qateliginen tapsyrys berilgen. 16 qarashada Sendberg bul qatelikti moinyna alǵan.
Facebook byltyr Cambridge Analytica kompaniiasy 50 million qoldanýshynyń málimetin saiasi jarnama jasaýǵa jinaǵany áshkerelengen soń qatań synǵa ushyraǵan. Mark Tsýkerberg málimetter bazasynyń buzylǵanyna jáne saiasi kampaniia kezinde áleýmettik jeliniń "jalǵan habar" taratyp, jekkórýshilikti týdyrýda paidalanylǵanyna kináli ekenin moiyndaǵan.
