Foto: aa.com.tr
AQSh prezidenti ákimshiligi Ýkraina biligine soǵystyń sheshýshi kezeńine qadam basqanyn, ýkrain armiiasy Batys elderinen úlken áskeri kómek alyp jatqanyn, maidan alańynda barynsha nátijege jetýge tiis ekenin eskertken.
Bul jóninde Washington Post basylymy óz derekkózine silteme jasap málimdedi, dep jazady Azattyq.
Aldaǵy ailar ońai bolmaitynyn qańtar aiynda Kievke barǵan amerikalyq sheneýnikter de eskertken.
Basylymǵa pikirin bildirgen derekkóz AQSh kongresiniń ókilder palatasyn baqylaityn respýblikashyldar Ýkrainaǵa áskeri kómekti azaitýǵa nietti ekenin jetkizgen.
Biyl jazda Ýkrainaǵa beriletin kómek aiaqtalady. Osydan keiin Kievke ári qarai qoldaý kórsetý qiyn bolady. Qazir Baiden ákimshiligi Ýkrainaǵa taǵy 10 mlrd dollar bólý úshin kongrespen jumys istep jatyr. Bul kómekti Reseidiń Ýkrainaǵa shabýyl bastaǵanyna bir jyl qarsańynda jariialaýy múmkin. Sol kezde Reseige taǵy qosymsha sanktsiialar salynýy yqtimal.
Gazetke suhbat bergen Baiden ákimshiliginiń ókili kóktemge qarai Resei shabýylǵa kóshetinin, Ýkraina tartyp alynǵan jerlerin qaitarý úshin qarsy shabýylǵa shyǵýy múmkin ekenin jetkizgen.
Amerikalyq sheneýnikterdiń pikirinshe, Ýkrainaǵa bir mezette Donetsk oblysyndaǵy Bahmýtty qorǵap ári qarsy shabýylǵa shyǵý qiyndaý bolýy múmkin. "Eger Ýkraina bir mezette barlyq jerde shabýylǵa shyqsa, bul Máskeýge tiimdi bolýy múmkin" dedi suhbat berýshi.
Budan bólek, Amerika barlaý qyzmeti Ýkraina Resei basyp alǵan Qyrymdy qaitara almaidy degen sheshimge kelgen.
Al Kiev Ýkrainanyń barlyq basyp alynǵan oblystaryn, onyń ishinde anneksiialanǵan Qyrymdy da qaitaryp alýǵa nietti.
Baiden ákimshiligi Ýkraina Reseimen kelissóz júrgizbes buryn aýmaǵyn qaitaryp alýǵa barynsha kúsh salýy kerek dep esepteidi.
