Foto: Ult.kz
20 aqpanda Women In Business forýmy áiel kásipkerlerdi, sarapshylardy jáne qoǵam kóshbasshylaryn bir alańǵa jinady. Is-sharaǵa 350-den astam qatysýshy jinalyp, kásipker áielder kezdesetin kedergiler men olardyń sheshý joldary talqylandy, dep habarlaidy Ult.kz.
Forýmda qarjylandyrýǵa qoljetimdilik, bilim berý jáne biznesti damytý máseleleri basty nazarda boldy. Genderlik teńdiktiń ekonomikalyq damýǵa áseri týraly shabyttandyratyn baiandamalar tyńdaldy.
Halyk Bank basqarma tóraiymy Ýmýt Shaiahmetova áielderdiń jumyspen qamtylýy men tabysynyń artýynyń el ekonomikasy úshin mańyzdylyǵyn atap ótti. Onyń aitýynsha, áielder men erler arasyndaǵy jalaqy aiyrmashylyǵy jahandyq deńgeide 7 trln dollarlyq ekonomikalyq shyǵyndarǵa ákeledi, al Qazaqstanda áielderdiń tabysy erlerden 26%-ǵa az.
"Áielderdiń kásipkerliktegi rólin arttyrý úshin Halyk Bank 2018 jyldan beri 'Kásiptegi áiel' baǵdarlamasy aiasynda 600-den astam kásipker áielge tómen paiyzdyq mólsherlememen 7 mlrd teńge kóleminde nesie usyndy. Banktiń ózinde de genderlik teńdikke basa mán beriledi: orta býyn basshylarynyń 63%-y áielder", — dedi Shaiahmetova.
Álemdik banktiń Ortalyq Aziiadaǵy óńirlik direktory Tatiana Proskýriakova genderlik teńdiktiń ekonomikalyq áleýeti zor ekenin atap ótti.
"Eger áielder erlermen teń dárejede ekonomikalyq qyzmetke qatyssa, Qazaqstannyń JIÓ 27%-ǵa ósýi múmkin", — dedi ol.
Visa kompaniiasynyń aimaqtyq menedjeri Kristina Dorosh áielderdi qoldaý bastamalarynyń nátijelerimen bólisti.
"She’s Next baǵdarlamasy aiasynda biz 16 500 áielge bilim berý, qarjylandyrý jáne biznesti damytý múmkindikterin usyndyq", — dedi ol.
Forým aiasynda master-klasstar, tájiribe almasý kezdesýleri jáne "Belesteri" baiqaýynyń jeńimpazdaryn marapattaý sharasy ótti. Bul bastama aýyl áielderine, jas kásipkerlerge jáne shaǵyn biznes ielerine qoldaý kórsetýge baǵyttalǵan.
Women In Business forýmy kásipker áielderdiń tájiribe almasýy jáne yntymaqtastyq ornatýy úshin mańyzdy alań ekenin taǵy bir ret dáleldedi.
