Qazaqstannyń Ishki ister ministrligi WhatsApp akkaýnttaryna ruqsatsyz qol jetkizý jaǵdailary kóbeiip otyrǵanyn eskertip, messendjerdegi jeke derekterdi qorǵaý boiynsha keńes berdi, dep habarlaidy ult.kz.
IIM mamandary eń aldymen eki satyly tekserýdi (2FA) qosýdy usynady. Ol úshin WhatsApp-ta «Baptaýlar» → «Akkaýnt» → «Eki satyly tekserý» → «Qosý» bólimderine ótip, alty tańbaly PIN-kod ornatý qajet. Sondai-aq akkaýntty qalpyna keltirýge arnalǵan elektrondyq poshta mekenjaiyn qosqan jón.
PIN-kod pen rastaý kodtaryn eshkimge berýge bolmaidy.
Politsiia sonymen qatar WhatsApp-qa qosylǵan qurylǵylardy turaqty túrde tekserýdi usynady. Ol úshin mázirden «Bailanystyrylǵan qurylǵylar» bólimine kirip, tizimdi qarap shyǵý kerek. Eger beitanys qurylǵy anyqtalsa, ony birden óshirý qajet.
Akkaýnttyń buzylǵanyn bildiretin negizgi belgiler:
- belgisiz qurylǵylardyń akkaýntqa qosylýy;
- sizdiń qatysýyńyzsyz habarlamalardyń jiberilýi;
- tanystaryńyzǵa sizdiń atyńyzdan kúmándi ótinishterdiń joldanýy;
- ózińiz suratpaǵan rastaý kodtarynyń SMS arqyly kelýi;
WhatsApp akkaýntynan ózdiginen shyǵyp qalý.
IIM azamattardy kúmándi siltemelerge ótpeýge jáne beitanys adamdardyń nusqaýymen bógde qosymshalardy ornatpaýǵa shaqyrdy.
Eger akkaýntta ruqsatsyz belsendilik baiqalsa, barlyq belsendi seanstardy dereý aiaqtap, eki satyly tekserý PIN-kodyn ózgertý jáne bailanystaǵy adamdarǵa akkaýnttyń buzylýy múmkin ekenin eskertý qajet.
Akkaýnt buzylǵan jaǵdaida quqyq qorǵaý organdaryna júginýge bolady.
