Donald Tramp AQSh prezidenttigine Respýblikalyq partiiadan resmi túrde kandidat bolyp usynylardan eki aptadai buryn sailaý shtabynyń jetekshisi Pol Manafort reseilik milliarder Oleg Deripaskaǵa araǵa kisi salyp, AQSh-taǵy sailaý naýqanynyń barysy týraly jeke aqparat berip otyrýǵa ázir ekenin jetkizgen. Bul týraly sársenbi kúni keshke The Washington Post basylymy habarlady, dep jazady Azattyq.
Manafort oǵan deiin Kremlge jaqyn oligarhpen birshama ýaqyt biznes áriptes bolǵan.
Ótken jylǵy AQSh prezidenti sailaýyna "Reseidiń aralasýy" jaily isti tekserip jatqan arnaiy prokýror Robert Miýllerdiń qolyndaǵy ondaǵan myń qujattyń arasynda Manaforttyń elektrondyq hattary da bar ekendigi aitylady.
Manaforttyń usynysy Deripaskaǵa jetkeni jóninde nemese qandai da bir brifingtiń bolǵany jaily derekter joq dep jazady basylym. Alaida tergeýshiler Deripaskaǵa joldanǵan usynystyń ózi Manaforttyń Trampqa jaqyndyǵyn paidalanyp, materialdyq paida tabýǵa tyrysqanyn, al Reseige Amerikadaǵy sailaý protsesine tikelei yqpal etýge múmkindik bolǵanyn dáleldeidi dep sanaidy.
Pol Manafort 2016 jylǵy AQSh-taǵy prezidenttik sailaý naýqany kezinde kandidat Donald Tramptyń tóńireginiń reseiliktermen bailanystaryn tekserý isindegi negizgi tulǵalardyń biri. Byltyr maýsymda Tramptyń sailaý shtaby basshysy bolyp taǵaiyndalysymen Manafort kishi Donald Tramptyń reseilik zańger Natalia Veselnitskaiamen kezdesýine qatysqan. Sol jylǵy tamyzdyń ortasynda, Ýkrainanyń eks-prezidenti Viktor Ianýkovichpen saiasi jáne iskerlik bailanystarynyń jai-japsary anyqtalǵannan keiin Pol Manafort Tramptyń sailaý shtaby basshylyǵynan otstavkaǵa ketýge májbúr bolǵan.
