"Pýtin saraiy" degen atpen belgili Gelendjiktegi keshen alǵashynda Resei prezidentiniń dosy, "Ozero" kooperativiniń burynǵy múshesi Nikolai Shamalovqa tiesili bolǵan. Alaida jobaǵa qatysy bar adamdar ony keshenniń qaǵaz júzindegi iesi ǵana dep biledi. Quny milliardtaǵan rýbl (1 mlrd 300 mln dollar) bolatyn rezidentsiiany satqan kezde oǵan tek 4,9 mln rýbl ǵana tigen.
VVS-diń Orys qyzmetiniń qolyna túsken joba jaily ishki qujattarda osyndai málimet kórsetilgen. Zertteý avtorlarynyń aitýynsha, qujattar memlekettiń keshendi salýǵa kóp úles qosqanyn kórsetedi jáne oppozitsiialyq saiasatker Aleksei Navalnyidyń qańtar aiynda jariialaǵan zertteýinde aitylǵan tujyrymdarynyń basym bóligin rastaidy. Zertteýde saraidyń iz júzinde prezident Vladimir Pýtinge arnalyp salynǵany aitylǵan edi.
- Aleksei Navalnyidyń "Pýtin saraiy" atty zertteý filmi internette 19 qańtarda jariialanǵan. Sáýirge taman film 115 mln ret kórildi. Filmde Gelendjik túbindegi aýmaǵy 68 gektar bolatyn Resei prezidentine arnalyp salynǵan rezidentsiianyń 2010 jyly boi kótergeni aitylady. Oǵan milliard dollardan astam qarajat jumsalǵan. Keshen aýmaǵynda muz saraiy, akvadiskoteka, kontsert zaly, shirkeý, "sháihanamen jalǵaityn" 80 metrlik kópir, teńizge aparatyn týnnel bar. Navalnyi komandasynyń málimetinshe, sarai ofshordaǵy qarajat esebinen turǵyzylǵan, ofshorǵa Pýtin mańyndaǵy kásipkerler aqsha quiyp, "qaiyrymdylyq" jasaǵan.
- Zertteýge túsinikteme bergen Vladimir Pýtin saraidyń óz atyna tirkelmegenin jáne týystaryna da tiesili bolmaǵanyn aitqan.
- Al buǵan jaýap bergen Navalnyi komandasy Nikolai Shamalov ta, qurylysty basqarǵan Pýtinniń jieni Mihail Shelomov ta Reseidiń otbasy kodeksi boiynsha, prezidenttiń jaqyn týystary sanatyna jatpaitynyn aitty.
- Keiinirek Pýtin burynnan beri tanityn kásipker Arkadii Rotenberg "nysannyń iesimin" dep málimdedi. Ol onda apart-qonaqúi salatynyn aitty. Memlekettik "Rossiia-1" arnasy kórsetken kadrlardan ol jaqta jóndeý jumystary júrip jatqanyn kórýge bolady.
- Azattyq
