Qazaqstanda volonterlik qyzmetti eńbek ótiline qosý josparlanyp otyr. Bul jaiynda QR Aqparat jáne qoǵamdyq damý ministrligi Azamattyq qoǵam isteri komitetiniń tóraiymy Áliia Ǵalymova aitty, dep habarlaidy QazAqparat.
«Tolyqtai alǵanda, josparda Qazaqstanda volonterlikti damytýdyń 7 baǵytyn júzege asyrý kózdelgen. Birinshisi - volonterlik qyzmetti damytý úshin qolaily ortany damytý. Bul baǵyt aiasynda volonterlik qyzmet máseleleri jónindegi zań jobasyn ázirleý josparlanǵan. Kolledjder men joǵary oqý oryndaryna túsý barysynda volonterlik qyzmetti esepke alý normasy usynylady. Sondai-aq eńbek ótiline volonterlik jumys tájiribesin qosý boiynsha da norma ázirleimiz. Volonterlik qyzmettiń eldiń áleýmettik-ekonomikalyq damýyna úlesin baǵalaý ádistemesi jasalady. Ol odan ary statistikalyq esepterge engiziledi», - dedi ol elordada ótken Aqparat jáne qoǵamdyq damý salasyndaǵy qoǵamdyq keńestiń otyrysynda.
Onyń atap ótýinshe, jospardyń kelesi baǵyttary volonterlik qyzmet infraqurylymdaryn damytýdy, onyń qatysýshylarynyń áleýetin arttyrýdy kózdeidi. Bul rette Volonterler jyly aiasynda ótetin volonterlik jobalardy úilestirý úshin biryńǵai jobalyq keńseler men volonterlerdi qoldaý ortalyqtary qurylady. Volonterlik qyzmetke azamattardyń qatysýy keńeitilip, korporativtik volonterlik jobalar júzege asyrylady. Volonterlik salasyndaǵy halyqaralyq yntymaqtastyq damytylady. Volonterler jylynyń qorytyndysynda konferentsiia ótkizilip, «Jyl volonteri» halyqaralyq syilyǵy tabys etiledi.
7 baǵyt aiasynda volonterlik salasyn damytý úshin 7 ulttyq jobany júzege asyrý josparlanǵan.
