Aqtóbelik kásipker qaiyrymdylyq is jasaýdyń qazaq halqynyń qanynda baryn aita kele, buqarany qaiyrymdylyqpen ainalysýǵa shaqyrdy, dep habarlaidy QazAqparat.
«Bizdiń qor 15 jyl boiy ártúrli salada qyzmet jasap keledi. Onyń negizin qurýshy Islambek Saljanov degen aqtóbelik azamat. Ózi aýyldyq jerden shyqqan. Óz aýylynda 150 oryndyq zamanaýi balabaqsha, sondai-aq memleketpen birigip mýzei salǵan. Odan da basqa qazirgi tańda 40-tan astam isti júzege asyryp jatyrmyz. Sonymen qatar bilim salasynyń damýyna da óz úlesimizdi qosyp jatyrmyz. Onyń ishinde aýyldyq balalardy UBT-ǵa jáne shetelge oqýǵa túsýge tegin daiyndap jatyrmyz. Aitarym, kásipkerler de qoǵamnyń bir bólshegi, qolymyzdan kelgenshe kómektesemiz», - dedi «Altyn Qyran Foundation» qoǵamdyq qorynyń atqarýshy direktory Maqsutbek Aitmaǵambet.
Onyń aitýynsha, qazaq tili, tarih jáne tól mádenietti qoldaý men damytýǵa arnalǵan sharalar óz jalǵasyn tabady.
«Bir qýantarlyǵy, Memleket basshysynyń bastamasymen jariialanǵan volonter jylynyń odan ári jalǵasyp jatqany. Taǵy bir aityp ótetin dúnie, bizge endi jetip jatqan «volonter», «metsenat» sózderi qazaq uǵymynda burynnan bar. Bizdiń tarihymyzda halyq dalada qalmaǵan, túrme degen túsinik bolmaǵan. Bizdiń halyq árdaiym qaiyrymdy bolǵan. Jetim-jesirin dalaǵa tastamaǵan, bul bizdiń qanymyzda bar. Endi biz sony «Rýhani jańǵyrý» baǵdarlamasy aiasynda qaita zamanaýi túrde jańǵyrtýymyz kerek», - deidi ol.
Aita ketsek, elordada QR Aqparat jáne qoǵamdyq damý ministri Aida Balaevanyń qatysýymen «Qaiyrymdylyq ister» marafony respýblikalyq aktsiiasynyń saltanatty ashylý rásimi ótip jatyr.
